(मुंबई)
महाराष्ट्र राज्य परीक्षा परिषदेतर्फे 28 जून रोजी होणाऱ्या शिक्षक पात्रता परीक्षा (TET 2026) संदर्भात ड्रेस कोडबाबत सुरू असलेल्या चर्चांवर परीक्षा परिषदेने स्पष्ट भूमिका मांडली आहे. महिला उमेदवारांना कोणत्याही प्रकारचे कपडे, दुपट्टा किंवा बुरखा परिधान करण्यास बंदी नसल्याचे स्पष्ट करताना, परीक्षा केंद्रात सीसीटीव्ही कॅमेऱ्यात चेहरा पूर्णपणे स्पष्ट दिसणे अनिवार्य असल्याचे सांगण्यात आले आहे.
परीक्षा परिषदेचे अध्यक्ष नंदकुमार बेडसे यांनी स्पष्ट केले की, परीक्षेतील पारदर्शकता आणि ओळख पडताळणी प्रक्रियेच्या दृष्टीने उमेदवाराचा चेहरा, डोके, कान आणि तोंड स्पष्ट दिसणे आवश्यक आहे. त्यामुळे परीक्षा कालावधीत कोणत्याही प्रकारचे आवरण जे चेहरा झाकते ते काढणे आवश्यक ठरेल.
ड्रेस कोड नव्हे, पारदर्शकतेसाठी नियम – परीक्षा परिषद
परीक्षा परिषदेने दिलेल्या स्पष्टीकरणात सांगण्यात आले आहे की, उमेदवारांना त्यांच्या धार्मिक किंवा वैयक्तिक पोशाखाबाबत कोणतीही सक्ती नाही. मात्र परीक्षा केंद्रातील वर्गखोल्यांमध्ये सीसीटीव्ही निरीक्षण सुरू असल्याने ओळख स्पष्ट दिसणे आवश्यक आहे. याआधी प्रसिद्ध करण्यात आलेल्या मार्गदर्शक सूचनांमध्ये दुपट्टा, बुरखा, टोपी, मास्क यासारख्या वस्तूंवर निर्बंध असल्याचे नमूद करण्यात आले होते. या पार्श्वभूमीवर निर्माण झालेल्या वादानंतर परीक्षा परिषदेने हा खुलासा केला आहे.
TET परीक्षेच्या नियमांवरून काही शिक्षक आणि सामाजिक घटकांनी आक्षेप घेतला होता. त्यानंतर परीक्षा परिषदेने स्पष्ट केले की कोणत्याही धार्मिक भावना दुखावण्याचा उद्देश नाही, तर परीक्षा प्रक्रियेतील पारदर्शकता राखणे हा मुख्य हेतू आहे.
देशातील इतर परीक्षांसारखेच नियम
परीक्षा परिषदेने स्पष्ट केले की यूपीएससी, एसएससी, आयबीपीएस, एसबीआय, आरआरबी, गेट तसेच राज्य लोकसेवा आयोगांच्या परीक्षांमध्येही ओळख पडताळणीसाठी चेहरा झाकणाऱ्या वस्तूंवर निर्बंध आहेत. बायोमेट्रिक पडताळणी आणि सीसीटीव्ही मॉनिटरिंगसाठी चेहरा स्पष्ट दिसणे आवश्यक मानले जाते.
गैरप्रकार रोखण्यासाठी कठोर उपाय
परीक्षा परिषदेच्या मते, मागील काही परीक्षांमध्ये मोबाईल, ब्लूटूथ डिव्हाइस आणि इतर इलेक्ट्रॉनिक साधनांचा गैरवापर झाल्याचे समोर आले आहे. त्यामुळे परीक्षा केंद्रांवर अधिक कडक निरीक्षण ठेवण्यात येणार आहे. तोंड किंवा चेहरा झाकल्यास संशयास्पद हालचाली ओळखणे कठीण होते, तसेच पडताळणी प्रक्रियेत अडचणी येऊ शकतात. त्यामुळे संपूर्ण चेहरा सीसीटीव्हीमध्ये स्पष्ट दिसणे बंधनकारक करण्यात आले आहे.
राज्यातील सुमारे 6 लाखांहून अधिक उमेदवारांनी TET परीक्षेसाठी नोंदणी केली आहे. परीक्षा प्रक्रियेत पारदर्शकता राखण्यासाठी यंदा नियम अधिक काटेकोर करण्यात आले आहेत. परीक्षा 28 जून रोजी होणार असून सर्व केंद्रांवर सीसीटीव्ही देखरेखीखाली परीक्षा पार पडणार आहे. दरम्यान, नव्या नियमांवरून निर्माण झालेला वाद आता परीक्षा परिषदेच्या खुलाशानंतर काहीसा शांत होण्याची शक्यता व्यक्त केली जात आहे.
