(रत्नागिरी / प्रतिनिधी)
जिद्द, सातत्यपूर्ण मेहनत आणि योग्य प्रशिक्षणाच्या जोरावर वय ही केवळ संख्या ठरते, याची प्रेरणादायी प्रचिती रत्नागिरीच्या चिमुकली ट्रिया टबिथा राकेश विलणकर हिने राज्यस्तरावर आपल्या उल्लेखनीय कामगिरीतून दिली आहे. अवघ्या साडेचार वर्षांच्या या बाल जलतरणपटूने पुणे येथील बालेवाडीमध्ये पार पडलेल्या राज्यस्तरीय जलतरण स्पर्धेत कांस्यपदक पटकावत रत्नागिरीच्या क्रीडा विश्वाचा मान उंचावला आहे.
पुण्यातील श्री शिवछत्रपती क्रीडा संकुल, बालेवाडी येथे १७ मे २०२६ रोजी आयोजित करण्यात आलेल्या “महाराष्ट्र राज्य सिनियर व लोअर एज ग्रुप ॲक्वाटिक चॅम्पियनशिप २०२६” स्पर्धेत राज्यभरातील विविध जिल्ह्यांतील जलतरणपटूंनी सहभाग नोंदवला होता. या प्रतिष्ठित स्पर्धेतील अंडर-५ वयोगटातील ५० मीटर बॅकस्ट्रोक प्रकारात ट्रियाने आत्मविश्वासपूर्ण आणि वेगवान पोहण्याचे अप्रतिम प्रदर्शन करत तिसरा क्रमांक मिळवला. एवढ्या लहान वयात राज्यस्तरावर पदक पटकावण्याची ही कामगिरी विशेष कौतुकास्पद मानली जात आहे. रत्नागिरीतील Aqua Techniques Ratnagiri Swimming Club मध्ये सराव करणाऱ्या ट्रियाने सातत्य, चिकाटी आणि अथक मेहनतीच्या बळावर हे यश संपादन केले. तिच्या यशामागे प्रशिक्षक विवेक विलणकर यांचे तांत्रिक मार्गदर्शन आणि पालकांचा प्रोत्साहनात्मक पाठिंबा महत्त्वाचा ठरल्याची भावना क्रीडावर्तुळातून व्यक्त होत आहे.
मोबाईल आणि डिजिटल माध्यमांच्या वाढत्या प्रभावाच्या काळात लहान मुलांनी खेळ, क्रीडा आणि शारीरिक तंदुरुस्तीची कास धरणे किती आवश्यक आहे, याचे उत्तम उदाहरण ट्रियाने आपल्या यशातून घालून दिले आहे. तिच्या या उल्लेखनीय यशामुळे रत्नागिरी जिल्ह्यात आनंदाचे वातावरण निर्माण झाले असून विविध स्तरांतून तिच्यावर अभिनंदनाचा वर्षाव होत आहे. भविष्यात राष्ट्रीय आणि आंतरराष्ट्रीय स्तरावरही ट्रिया रत्नागिरीचे नाव उज्ज्वल करेल, असा विश्वास व्यक्त केला जात आहे.
