(मुंबई)
मुख्यमंत्री माझी लाडकी बहीण योजना अंतर्गत ई-KYC पूर्ण करण्याची अंतिम मुदत आज (30 एप्रिल) संपत असून लाभार्थी महिलांसाठी हा शेवटचा दिवस आहे. राज्यभरात या योजनेला मोठा प्रतिसाद मिळाला असला तरी तांत्रिक अडचणी, चुकीची माहिती आणि पडताळणी प्रक्रियेमुळे हजारो अर्ज अजूनही प्रलंबित आहेत.
पुणे जिल्ह्यात सर्वाधिक प्रतिसाद
पुणे जिल्ह्यात या योजनेला सर्वाधिक प्रतिसाद मिळाला असून 21 लाखांहून अधिक महिलांची पात्र लाभार्थी म्हणून नोंद झाली आहे.
जिल्हा प्रशासनाच्या माहितीनुसार:
- पोर्टलवर प्राप्त अर्ज: 11,24,920
- ‘नारीशक्ती’अंतर्गत नोंद: 9,76,660
- एकूण पात्र लाभार्थी: 21,01,580
राज्यभरात एकूण 1.12 कोटी अर्ज प्राप्त झाले असून त्यापैकी 1.06 कोटी अर्ज मंजूर करण्यात आले आहेत.
पडताळणीत धक्कादायक प्रकार
योजनेच्या निकषात न बसणाऱ्या लाभार्थ्यांची छाननी सुरू असून, चारचाकी वाहन असलेल्या 75 हजारांहून अधिक महिलांची तपासणी करण्यात येत आहे. दरम्यान, पुण्यात बनावट कागदपत्रांच्या आधारे 1201 पुरुषांनी या योजनेचा लाभ घेतल्याचे उघड झाले आहे. त्यामुळे प्रशासनाने पडताळणी प्रक्रिया अधिक कडक केली आहे.
ई-KYCमध्ये चुका, अर्ज अपात्र
अनेक महिलांनी ई-KYC करताना चुकीचे पर्याय निवडल्याने पात्र असूनही अर्ज अपात्र ठरले. अशा महिलांना पुन्हा संधी देण्यात आली असून, अंतिम मुदतीपूर्वी प्रक्रिया पूर्ण करण्याचे आवाहन प्रशासनाने केले आहे. तांत्रिक त्रुटींमुळे सुरुवातीला सुमारे अडीच लाख अर्ज पुनर्पडताळणीसाठी ठेवण्यात आले होते. योजनेअंतर्गत मिळणारा 1500 रुपयांचा मार्च महिन्याचा हप्ता अद्याप लाभार्थ्यांच्या खात्यात जमा झालेला नाही. 24 मार्च रोजी फेब्रुवारी महिन्याचा हप्ता जमा झाला होता, मात्र एप्रिल अखेरपर्यंत मार्चचा हप्ता मिळालेला नसल्याने लाभार्थ्यांमध्ये नाराजी आहे.
ई-KYCची अंतिम मुदत संपण्याच्या उंबरठ्यावर असताना लाखो अर्ज प्रलंबित आहेत, तर दुसरीकडे मार्चचा हप्ता रखडल्याने लाभार्थी महिलांमध्ये संभ्रम आणि अपेक्षा दोन्ही वाढल्या आहेत.
