(रत्नागिरी / प्रतिनिधी)
तालुक्यात राबविण्यात येत असलेल्या ‘लखपती दीदी’ योजनेच्या अंमलबजावणीत गंभीर त्रुटी असल्याचे प्रकरण पंचायत समितीच्या सभेत उघडकीस आले. उद्दिष्टपूर्तीसाठी पात्र नसलेल्या महिलांचीही माहिती ‘अप्रत्यक्षपणे’ भरली जात असल्याचा आरोप सदस्यांनी करत प्रशासनावर ताशेरे ओढले. याच बैठकीत प्राथमिक आरोग्य केंद्रांमधील मधुमेह तपासणी बंद करण्याच्या निर्णयावरही तीव्र नाराजी व्यक्त करण्यात आली.
सभापती प्रविण मेस्त्री यांच्या अध्यक्षतेखाली झालेल्या या बैठकीत विविध विषयांवर सविस्तर चर्चा झाली. महाराष्ट्र राज्य ग्रामीण जीवनोन्नती अभियानाच्या अधिकाऱ्यांकडून माहिती सादर होत असताना ‘लखपती दीदी’ योजनेवरून सभागृह तापले. केडरमार्फत जबरदस्तीने, तसेच अप्रत्यक्ष दबाव टाकून महिलांची नावे योजनेत समाविष्ट केली जात असल्याचा गंभीर आरोप सदस्यांनी केला. प्रत्यक्षात उत्पन्न निकष पूर्ण न करणाऱ्या गरीब व गरजू महिलांनाही ‘लखपती’ म्हणून नोंदवले जात असल्याने योजनाच बदनाम होत असल्याची खंत व्यक्त करण्यात आली.
या प्रकारामुळे ‘उमेद’ अभियानातील अनेक महिला बाहेर पडण्याच्या तयारीत असल्याचेही सदस्यांनी नमूद केले. ही बाब पालकमंत्री उदय सामंत यांच्या निदर्शनास आणून देण्याचा इशारा देण्यात आला. यानंतर सभापतींनी संबंधित केडरची स्वतंत्र बैठक घेऊन वास्तव स्थिती स्पष्ट करण्याचे निर्देश दिले. दरम्यान, पाणलोट विकास निधीच्या वाटपावरूनही सभागृहात कडाक्याची चर्चा रंगली. गावांसाठी मंजूर असलेला निधी अद्याप वितरित न झाल्याची तक्रार सदस्यांनी मांडली. तसेच निधीच्या नियोजनाबाबत ग्रामसंघांना कोणतीही माहिती देण्यात आलेली नसल्याचेही निदर्शनास आणून दिले.
आरोग्य विभागाच्या ‘माझं गाव, आरोग्य संपन्न’ या अभियानाच्या पार्श्वभूमीवरच प्राथमिक आरोग्य केंद्रांमधील मधुमेह तपासणी बंद करण्यात आल्याचा मुद्दा उपस्थित करत सदस्यांनी प्रशासनाला जाब विचारला. यावर तालुका वैद्यकीय अधिकाऱ्यांनी शासनाच्या आदेशानुसार ही तपासणी स्थगित करण्यात आल्याचे स्पष्ट केले; मात्र या उत्तराने असमाधानी सदस्यांनी संतप्त प्रतिक्रिया नोंदवली. या बैठकीस उपसभापती गजानन धनावडे, गटविकास अधिकारी चेतन शेळके, तसेच सदस्य नेताजी पाटील, स्वप्निल मयेकर, वैभव पाटील, परेश सावंत, सुमेश आंबेकर, सचिन सुपले, कांचन नागवेकर आदी उपस्थित होते.
