( पुणे )
राज्यातील प्राध्यापक भरती प्रक्रियेला पुन्हा एकदा विलंब होत असल्याने उमेदवारांमध्ये नाराजी वाढली आहे. सार्वजनिक विद्यापीठे आणि अनुदानित महाविद्यालयांमध्ये हजारो पदे रिक्त असल्याने शैक्षणिक कामकाजावर परिणाम होत असून, हा मुद्दा पुन्हा चर्चेच्या केंद्रस्थानी आला आहे. दरम्यान, राज्याचे उच्च व तंत्र शिक्षण मंत्री चंद्रकांत पाटील यांनी पुण्यात माध्यमांशी संवाद साधताना भरती प्रक्रियेबाबत नवी डेडलाईन जाहीर केली. यापूर्वी मार्च 2026 अखेरपर्यंत भरती पूर्ण करण्याचे आश्वासन देण्यात आले होते. मात्र, आता ही प्रक्रिया जून 2026 अखेरपर्यंत पूर्ण केली जाईल, असे त्यांनी स्पष्ट केले.
भरती प्रक्रिया अंतिम टप्प्यात
सध्या प्राध्यापक भरतीसाठी जाहिराती, अर्ज प्रक्रिया आणि छाननी पूर्ण झाली असून आता मुलाखती आणि नियुक्तीचा अंतिम टप्पा बाकी आहे. त्यामुळे पुढील काही महिन्यांत भरती प्रक्रिया पूर्ण होण्याची शक्यता व्यक्त केली जात आहे.
मोठ्या प्रमाणावर पदे भरणार
राज्यातील शैक्षणिक क्षेत्रासाठी ही मोठी भरती ठरणार आहे.
- सुमारे 5,500 प्राध्यापक पदे
- 2,900 शिक्षकेतर कर्मचारी
- विद्यापीठांमध्ये 700 प्राध्यापक पदे
अशी एकूण मोठ्या प्रमाणावर भरती केली जाणार आहे. ही भरती गेल्या 20-25 वर्षांतील सर्वात मोठी असल्याचा दावा सरकारकडून करण्यात आला आहे.
या भरतीनंतर तासिका तत्त्वावरील (CHB) प्राध्यापकांची गरज मोठ्या प्रमाणात कमी होईल, असेही सांगण्यात आले. सध्या अनेक महाविद्यालये CHB प्राध्यापकांवर अवलंबून असल्याने शिक्षणाच्या गुणवत्तेवर परिणाम होत असल्याची टीका होत आहे.
तासिका तत्त्वावरील प्राध्यापकांच्या मानधनात वाढ करण्याचाही प्रस्ताव सरकारच्या विचाराधीन आहे. सध्या 900 रुपये असलेले मानधन 1,200 रुपयांपर्यंत वाढवण्याचा निर्णय लवकरच घेतला जाऊ शकतो.
भरती प्रक्रिया वारंवार पुढे ढकलली जात असल्याने उमेदवारांमध्ये असंतोष वाढत आहे. रिक्त पदांचा वाढता ताण आणि आंदोलनांच्या पार्श्वभूमीवर हा मुद्दा अधिक संवेदनशील बनला आहे.
आता जून 2026 ही नवी डेडलाईन सरकार पूर्ण करते का, याकडे राज्यभरातील उमेदवार आणि शैक्षणिक क्षेत्राचे लक्ष लागले आहे.
