(पुणे/नाशिक)
भोंदूबाबा अशोक खरात याच्याभोवतीचे वाद दिवसेंदिवस तीव्र होत असून, रोजरोज समोर येणाऱ्या नव्या माहितींमुळे राज्याच्या राजकारणात मोठी खळबळ उडत आहे. एसआयटीकडून चौकशी सुरू असली तरी तपासाच्या गतीवर आणि दिशेवर सतत प्रश्न उपस्थित केले जात आहेत. या प्रकरणामुळे राष्ट्रवादी काँग्रेसच्या नेत्या रुपाली चाकणकर यांना आधी महिला आयोगाच्या अध्यक्षपदाचा आणि नंतर पक्षाच्या महिला प्रदेशाध्यक्ष पदाचा राजीनामा द्यावा लागला. त्यामुळे या प्रकरणाचे राजकीय पडसाद अधिक तीव्र झाले आहेत.
शिवसेना नेत्या सुषमा अंधारे यांनी या प्रकरणावर आक्रमक भूमिका घेत पुन्हा एकदा गंभीर प्रश्न उपस्थित केले आहेत. चाकणकर यांचे तब्बल 177 कॉल अशोक खरातला झाल्याचा दावा करत, एवढे पुरावे असताना त्यांना अद्याप चौकशीसाठी ताब्यात का घेतले गेले नाही, असा थेट सवाल त्यांनी केला आहे. या प्रकरणात केवळ आरोप-प्रत्यारोप न राहता तपास प्रक्रियेवरच प्रश्नचिन्ह निर्माण होत असल्याचेही त्यांनी म्हटले.
दरम्यान, सामाजिक कार्यकर्त्या अंजली दमानिया यांनी या प्रकरणाला नवे वळण दिले आहे. त्यांनी अशोक खरातच्या कॉल डिटेल रेकॉर्डची (सीडीआर) प्रत आपल्या हातात असल्याचा दावा करत ही माहिती मुख्यमंत्री देवेंद्र फडणवीस आणि पोलीस महासंचालकांकडे दिल्याचे सांगितले. त्यांच्या मते, रुपाली चाकणकर यांचे 177 तर त्यांच्या बहिणी प्रतिभा चाकणकर यांचे 236 कॉल अशोक खरातशी झाले आहेत, जे तपासासाठी अत्यंत महत्त्वाचे ठरू शकतात.
या प्रकरणात काही वरिष्ठ राजकीय नेत्यांचेही नाव समोर आल्याने वाद आणखीच वाढला आहे. उपमुख्यमंत्री एकनाथ शिंदे यांचे 17 कॉल असून त्यातील एक संभाषण 21 मिनिटांचे असल्याचा दावा करण्यात आला आहे. तसेच चंद्रकांत पाटील आणि सुनील तटकरे यांचे प्रत्येकी आठ कॉल असल्याचेही समोर आले आहे. या सर्व कॉल्सचा नेमका संदर्भ काय होता, याबाबत स्पष्टता येणे गरजेचे असल्याचे मत व्यक्त केले जात आहे.
दरम्यान, एसआयटीच्या तपासावरही आता थेट प्रश्न उपस्थित होत आहेत. बाहेर येणारी माहिती आणि तपास यामध्ये तफावत का आहे, तपासाचा वेग वाढत का नाही, तसेच इतके गंभीर आरोप असतानाही संबंधितांवर तातडीने कारवाई का होत नाही, असे अनेक सवाल सुषमा अंधारे यांनी विचारले आहेत. यामुळे सरकारची भूमिका आणि तपास यंत्रणांची कार्यपद्धती चर्चेचा विषय बनली आहे.
अशोक खरात प्रकरणात महिला लैंगिक शोषणासोबतच आर्थिक फसवणुकीचेही आरोप समोर येत असल्याने हे प्रकरण अधिकच गंभीर बनले आहे. येत्या काही दिवसांत या प्रकरणात आणखी मोठे खुलासे होण्याची शक्यता व्यक्त केली जात असून, राजकीय आणि सामाजिक पातळीवर याचे दूरगामी परिणाम होण्याची चिन्हे आहेत.
