( खेड )
मुंबई–गोवा महामार्गावरील भोस्ते घाटात आज (मंगळवारी) सकाळी सुमारे ८.३० वाजण्याच्या सुमारास ‘अलबत्या गलबत्या’ नाट्यसंघाच्या बसचा अपघात झाला. या घटनेत दोघेजण जखमी झाले असून त्यांच्यावर कळंबणी उपजिल्हा रुग्णालयात उपचार सुरू आहेत.
मिळालेल्या माहितीनुसार, ‘अलबत्या गलबत्या’ नाटकाचा गोव्यातील प्रयोग आटोपून संपूर्ण नाट्यसंघ मुंबईकडे परतत होता. भोस्ते घाट उतरत असताना बसने समोर चाललेल्या ट्रकला पाठीमागून जोरदार धडक दिली. घाट उतरताना बसच्या ब्रेकमध्ये बिघाड झाल्याने हा अपघात घडल्याची प्राथमिक शक्यता व्यक्त करण्यात येत आहे.
या अपघातात नाटकाचे साउंड आर्टिस्ट विलास दाते आणि बस चालक प्रकाश आव्हाड हे जखमी झाले. विलास दाते यांच्या डोक्याला दुखापत झाल्याने त्यांना तीन टाके घालावे लागले आहेत. अपघातानंतर स्थानिक नागरिकांनी तत्काळ मदतकार्य करत जखमींना रिक्षामधून कळंबणी उपजिल्हा रुग्णालयात दाखल केले.
घटनेची माहिती मिळताच साहित्यप्रेमी उत्तमकुमार जैन यांनी रुग्णालयात भेट देऊन जखमींची विचारपूस केली व आवश्यक सहकार्य केले.
दरम्यान, अपघातावेळी बसमध्ये सुमारे २५ जण प्रवास करत होते; सुदैवाने या घटनेत मोठी जीवितहानी टळली.
