(नवी दिल्ली)
पश्चिम आशियातील तणावपूर्ण परिस्थिती आणि संभाव्य पुरवठा अडचणींच्या पार्श्वभूमीवर घरगुती गॅस वितरणाबाबत मोठा निर्णय घेण्यात आल्याची माहिती समोर येत आहे. आखाती देशांमध्ये सुरू असलेल्या संघर्षाचा परिणाम ऊर्जा पुरवठ्यावर होण्याची शक्यता लक्षात घेऊन केंद्र सरकारने एलपीजी सिलिंडर बुकिंगच्या नियमांमध्ये बदल केल्याचे सांगितले जात आहे. नव्या निर्देशांनुसार, ग्राहकांना आता दुसरा घरगुती गॅस सिलिंडर बुक करण्यासाठी 25 दिवसांची प्रतीक्षा करावी लागणार आहे. यापूर्वी हा कालावधी 15 दिवसांचा होता. म्हणजेच दुसऱ्या सिलिंडरच्या बुकिंगसाठीची प्रतीक्षा 10 दिवसांनी वाढवण्यात आली आहे.
महिन्यात फक्त एकच सिलिंडर
नव्या नियमांनुसार घरगुती तसेच व्यावसायिक ग्राहकांना महिन्यातून केवळ एकच सिलिंडर उपलब्ध करून दिला जाणार असल्याची माहिती मिळत आहे. या निर्णयाची कडक अंमलबजावणी करण्याचे निर्देश संबंधित गॅस वितरण कंपन्यांना देण्यात आले आहेत. गॅस पुरवठा आणि साठा संतुलित ठेवण्यासाठी ही तात्पुरती मर्यादा लागू करण्यात आली असल्याचे सांगितले जात आहे.
अचानक निर्णयामुळे ग्राहकांमध्ये संभ्रम
हा निर्णय कोणतीही पूर्वसूचना न देता अचानक लागू करण्यात आल्यामुळे अनेक ठिकाणी गॅस एजन्सी आणि ग्राहकांमध्ये गोंधळाचे वातावरण निर्माण झाले आहे. काही ठिकाणी ग्राहकांना नवीन नियमांची माहिती नसल्यामुळे बुकिंग करताना अडचणींचा सामना करावा लागत आहे.
आखाती देशांतील परिस्थितीचा परिणाम
ऊर्जा क्षेत्रातील तज्ज्ञांच्या मते, पश्चिम आशियातील तणावामुळे कच्चे तेल आणि नैसर्गिक वायूच्या पुरवठ्यावर परिणाम होण्याची शक्यता आहे. भारत मोठ्या प्रमाणात आयातीवर अवलंबून असल्यामुळे पुरवठा साखळीवर परिणाम होऊ शकतो. ही संभाव्य अडचण लक्षात घेऊन उपलब्ध साठा योग्य प्रकारे वापरला जावा आणि भविष्यात मोठी टंचाई निर्माण होऊ नये, यासाठीच सरकारने पुरवठ्यावर मर्यादा आणण्याचा निर्णय घेतल्याचे सांगितले जात आहे.
मोठ्या कुटुंबांवर परिणाम
नव्या नियमांमुळे मोठ्या कुटुंबांचे घरगुती नियोजन आणि महिन्याचे बजेट प्रभावित होण्याची शक्यता व्यक्त केली जात आहे. अनेक कुटुंबांना महिन्यात एकापेक्षा अधिक सिलिंडरची गरज भासते. आता 25 दिवसांची अट लागू झाल्याने गॅस वापराचे नियोजन अधिक काळजीपूर्वक करावे लागणार आहे. तज्ज्ञांच्या मते, आंतरराष्ट्रीय परिस्थिती स्थिर झाल्यानंतर या नियमांमध्ये पुन्हा बदल होण्याची शक्यता आहे. मात्र सध्याच्या परिस्थितीत ऊर्जा साठा सुरक्षित ठेवण्यासाठी सरकारकडून अशा उपाययोजना केल्या जात असल्याचे दिसून येत आहे.
देशात इंधन टंचाई होणार नाही – मुख्यमंत्री देवेंद्र फडणवीस यांची ग्वाही
देशात इंधन टंचाई होणार नाही अशी ग्वाही मुख्यमंत्री देवेंद्र फडणवीस यांनी दिली आहे. युद्ध परिस्थितीवर केंद्र सरकारचं लक्ष असून, परिस्थिती हाताळण्यासाठी सरकार सक्षम असल्याचं त्यांनी सांगितलं. तसंच नागरिकांनी अफवांवर विश्वास ठेवू नये असं आवाहनही त्यांनी केलं.
