🏆 टी-20 विश्वचषक 2026: भारताचा दणदणीत विजय! न्यूझीलंडचा 96 धावांनी पराभव; तिसऱ्यांदा विश्वविजेता बनत टीम इंडियाचा इतिहास

( अहमदाबाद )

क्रिकेटप्रेमींसाठी अभिमानाचा क्षण ठरलेल्या अंतिम सामन्यात भारताने दमदार कामगिरी करत ICC Men’s T20 World Cup 2026 चे विजेतेपद पटकावले. रविवारी अहमदाबाद येथे झालेल्या महाअंतिम सामन्यात भारताने न्यूझीलंडचा तब्बल 96 धावांनी पराभव करत इतिहास रचला. या विजयासह भारताने तिसऱ्यांदा टी-20 विश्वचषक जिंकत स्पर्धेच्या इतिहासात वेगळी नोंद केली आहे.

महत्त्वाची बाब म्हणजे, सूर्यकुमार यादव याच्या नेतृत्वाखाली भारतीय संघाने सलग दुसऱ्यांदा विश्वचषक जिंकत जेतेपद राखले. टी-20 विश्वचषकाच्या इतिहासात असा पराक्रम करणारा भारत हा पहिलाच संघ ठरला आहे. तसेच यजमान देश म्हणून घरच्या मैदानावर विश्वचषक जिंकणारा भारत हा पहिलाच संघ बनला आहे.

१९ नोव्हेंबर २०२३ रोजी याच अहमदाबादच्या मैदानावर ऑस्ट्रेलियाकडून झालेल्या पराभवाची आठवण अजूनही भारतीय चाहत्यांच्या मनात ताजी होती. त्यामुळे अंतिम सामन्यापूर्वी वातावरणात तणाव होता. मात्र भारतीय खेळाडूंनी जबरदस्त कामगिरी करत त्या पराभवाची जणू भरपाईच केली.

भारताची स्फोटक फलंदाजी; 255 धावांचा डोंगर

सामन्यात न्यूझीलंडने नाणेफेक जिंकून प्रथम गोलंदाजी करण्याचा निर्णय घेतला. मात्र भारतीय फलंदाजांनी सुरुवातीपासूनच आक्रमक खेळ करत कीवी गोलंदाजांची धुलाई केली. सलामीवीर अभिषेक शर्मा आणि  संजू सॅमसन यांनी पहिल्या विकेटसाठी 98 धावांची शानदार भागीदारी करत भारताला दमदार सुरुवात करून दिली.

अभिषेक शर्माने अवघ्या 21 चेंडूत 6 चौकार आणि 3 षटकारांच्या मदतीने 52 धावांचे वेगवान अर्धशतक झळकावले. दुसरीकडे संजू सॅमसननेही शानदार फलंदाजी करत 46 चेंडूत 5 चौकार आणि 8 षटकारांसह 89 धावांची तुफानी खेळी साकारली. यानंतर इशान किशन यानेही आक्रमक फलंदाजी करत 25 चेंडूत 4 चौकार आणि 4 षटकारांसह 54 धावा करत भारताचा डाव भक्कम केला. कर्णधार सूर्यकुमार यादव या सामन्यात खातेही न उघडता बाद झाला. Hardik Pandya याने 13 चेंडूत 18 धावा केल्या, तर तिलक वर्मा 8 धावांवर नाबाद राहिला.

डावाच्या शेवटच्या टप्प्यात Shivam Dube याने आक्रमक फलंदाजी करत केवळ 8 चेंडूत 26 धावा केल्या. त्याच्या या स्फोटक खेळीमुळे भारताने निर्धारित 20 षटकांत 5 बाद 255 धावांचा भला मोठा स्कोअर उभा केला. टी-20 विश्वचषकाच्या अंतिम सामन्यांमधील ही सर्वाधिक धावसंख्या ठरली.

न्यूझीलंडकडून Jimmy Neesham याने सर्वाधिक 3 विकेट घेतल्या. न्यूझीलंडचा डाव 159 धावांत आटोपला 256 धावांचे अवघड लक्ष्य गाठण्यासाठी मैदानात उतरलेल्या न्यूझीलंडची सुरुवात चांगली झाली नाही. 31 धावांवर  फिन ऍलन बाद झाला. त्यानंतर लगेचच रचिन रवींद्र 1 धाव करून माघारी परतला. या अडचणीत टिम सायफर्ट याने झुंजार फलंदाजी करत 26 चेंडूत 52 धावांची खेळी केली. त्याने 2 चौकार आणि 5 षटकार लगावत कीवी संघाला लढवय्या सुरुवात देण्याचा प्रयत्न केला.

मात्र भारतीय गोलंदाजांनी अचूक मारा करत न्यूझीलंडचा डाव कोलमडवला. ग्लेन फिलिप्स  5 धावांवर आणि मार्क चॅपमन 3 धावांवर बाद झाले. अखेर न्यूझीलंडचा संपूर्ण संघ 19 षटकांत 159 धावांत गारद झाला.

बुमराह आणि अक्षरची भेदक गोलंदाजी

भारतीय विजयात गोलंदाजांचाही मोठा वाटा राहिला. जसप्रीत बुमराहनं याने भेदक गोलंदाजी करत 4 विकेट घेत न्यूझीलंडच्या फलंदाजीचा कणा मोडला. त्याला Axar Patel याने उत्तम साथ देत 3 गडी बाद केले. त्यांच्या अचूक माऱ्यामुळे कीवी फलंदाजांना मोठी भागीदारी उभी करता आली नाही.

या सामन्यात बुमराहने टाकलेला 4 षटकांत 15 धावा आणि 4 विकेट्स असा स्पेल टी-20 विश्वचषकाच्या नॉकआउट सामन्यांमधील दुसरा सर्वोत्तम गोलंदाजीचा स्पेल ठरला आहे. दबावाच्या परिस्थितीत त्याने केलेल्या अचूक आणि धारदार गोलंदाजीने भारताला निर्णायक आघाडी मिळवून दिली. या सामन्यानंतर बुमराहने आणखी एक मोठा विक्रम आपल्या नावावर केला. टी-20 विश्वचषकाच्या इतिहासात सर्वाधिक विकेट्स घेणारा वेगवान गोलंदाज बनण्याचा मान त्याने पटकावला. याआधी हा विक्रम श्रीलंकेचा माजी वेगवान गोलंदाज लसिथ मलिंगा याच्या नावावर होता. मलिंगाने टी-20 विश्वचषकात 38 विकेट्स घेतल्या होत्या. मात्र बुमराहने आता 40 विकेट्स घेत हा विक्रम मोडीत काढला आहे.

टी-20 विश्वचषकात सर्वाधिक विकेट्स घेणारे वेगवान गोलंदाज 

• 40 विकेट्स – जसप्रीत बुमराह
• 38 विकेट्स – लसिथ मलिंगा
• 38 विकेट्स – अँरिच नॉर्टजे
• 36 विकेट्स – अर्शदीप सिंग
• 36 विकेट्स – टिम साउदी

भारताचा ऐतिहासिक विक्रम

या विजयासह भारताने अनेक मोठे विक्रम आपल्या नावावर केले.

• टी-20 विश्वचषक तीन वेळा जिंकणारा भारत पहिला संघ
• सलग दोन वेळा टी-20 विश्वचषक जिंकण्याचा पराक्रम
• घरच्या मैदानावर विश्वचषक जिंकणारा पहिला यजमान देश
• टी-20 विश्वचषक फायनलमध्ये सर्वाधिक धावसंख्या (255)

दरम्यान, न्यूझीलंडला पुन्हा एकदा अंतिम सामन्यात पराभवाचा सामना करावा लागला आणि विश्वचषक जिंकण्याचे त्यांचे स्वप्न अपूर्णच राहिले. राष्ट्रपती द्रौपदी मुर्मू, पंतप्रधान नरेंद्र मोदी यांनी तसेच केंद्रीय गृहमंत्री अमित शहा, लोकसभेतील विरोधी पक्षनेते राहुल गांधींनी या विजयाबद्दल टीम इंडियाचं अभिनंदन केलं. भारताच्या या दणदणीत विजयाने देशभरात जल्लोषाचे वातावरण असून चाहत्यांकडून भारतीय संघावर अभिनंदनाचा वर्षाव होत आहे.

आयसीसीच्या टि ट्वेंटी विश्वचषकाच्या सलग दुसऱ्या स्पर्धेत विश्वचषकांवर नाव कोरण्याची भारतीय संघाची ऐतिहासिक कामगिरी भारतीय क्रिकेट प्रेमींसाठी अनोखी भेट आहे. ही कामगिरी आणि खेळी क्रिकेट जगत कधीही विसरू शकणार नाही. त्यामुळे या ऐतिहासिक विजयासाठी जिगरबाज भारतीय क्रिकेटपटूंचे करावे तेवढे कौतुक थोडेच आहे, अशा शब्दांत मुख्यमंत्री देवेंद्र फडणवीस यांनी विश्वविजेतेपद पटकावणाऱ्या भारतीय संघाचे अभिनंदन केले आहे.

भारताला विश्वविजेता बनवणारे कर्णधार

टी-20 विश्वचषक 2026 च्या अंतिम सामन्यात न्यूझीलंडवर मोठा विजय मिळवत सूर्यकुमार यादव हा टी-20 विश्वचषक जिंकणारा नववा कर्णधार ठरला. भारतीय क्रिकेटच्या इतिहासात काही निवडक कर्णधारांनी देशाला जागतिक स्तरावर अभिमानास्पद यश मिळवून दिले आहे. कपिल देवपासून ते सूर्यकुमार यादवपर्यंत या कर्णधारांनी भारतीय क्रिकेटचा इतिहास घडवला. खाली भारताला विश्वचषक जिंकवून देणाऱ्या कर्णधारांचा गौरवशाली प्रवास जाणून घेऊया.

🏆 कपिल देव – 1983 वनडे विश्वचषक

कपिल देव यांनी भारतीय क्रिकेटमध्ये सुवर्णयुगाची सुरुवात केली. त्यांच्या नेतृत्वाखाली भारताने 1983 मध्ये प्रथमच Cricket World Cup 1983 जिंकत जगाला चकित केले. त्या काळात वेस्ट इंडिज हा जगातील सर्वात मजबूत संघ मानला जात होता. मात्र अंतिम सामन्यात भारताने वेस्ट इंडिजला पराभूत करत इतिहास रचला. या स्पर्धेत कपिल देव यांनी झिम्बाब्वेविरुद्ध खेळलेली नाबाद 175 धावांची ऐतिहासिक खेळी आजही क्रिकेट इतिहासातील महान डावांपैकी एक मानली जाते.

🏆 महेंद्रसिंग धोनी – 2007 टी-20 आणि 2011 वनडे विश्वचषक

भारतीय क्रिकेटच्या इतिहासातील सर्वात यशस्वी कर्णधारांपैकी एक म्हणजे महेंद्रसिंग धोनी. त्यांच्या नेतृत्वाखाली भारताने दोन मोठे विश्वचषक जिंकले. धोनीच्या नेतृत्वाखाली भारताने 2007 मध्ये पहिला ICC World Twenty20 2007 जिंकला. त्यानंतर 2011 मध्ये ICC Cricket World Cup 2011 जिंकत भारताला 28 वर्षांनंतर वनडे विश्वचषक मिळवून दिला. धोनी हा असा एकमेव कर्णधार ठरला ज्याने भारताला तीन विश्वचषकांच्या अंतिम फेरीत नेले. 2014 च्या टी-20 विश्वचषकातही भारत अंतिम फेरीत पोहोचला होता, मात्र त्या सामन्यात संघाला श्रीलंकेकडून पराभव पत्करावा लागला.

🏆 रोहित शर्मा – 2024 टी-20 विश्वचषक

आधुनिक भारतीय क्रिकेटमध्ये रोहित शर्मा यांने संघाला आक्रमक आणि निर्भय शैली दिली. त्यांच्या नेतृत्वाखाली भारताने अनेक मोठ्या स्पर्धांमध्ये दमदार कामगिरी केली. 2023 च्या वनडे विश्वचषकात भारत अपराजित राहून अंतिम फेरीत पोहोचला होता, मात्र त्या सामन्यात ऑस्ट्रेलियाकडून पराभव पत्करावा लागला. त्यानंतर 2024 च्या ICC Men’s T20 World Cup 2024 मध्ये भारताने दक्षिण आफ्रिकेला पराभूत करत विजेतेपद पटकावले.

🏆 सूर्यकुमार यादव – 2026 टी-20 विश्वचषक

या गौरवशाली यादीतील सर्वात नवीन नाव म्हणजे सूर्यकुमार यादव. रोहित शर्माच्या टी-20 निवृत्तीनंतर सूर्यकुमार यादवने भारतीय संघाचे नेतृत्व स्वीकारले. त्याच्या नेतृत्वाखाली भारताने 2026 च्या टी-20 विश्वचषकात शानदार कामगिरी करत अंतिम सामन्यात न्यूझीलंडचा पराभव केला. या विजयामुळे भारताने सलग दुसऱ्यांदा टी-20 विश्वचषक जिंकण्याचा ऐतिहासिक पराक्रम केला.

भारतीय क्रिकेटचा गौरवशाली प्रवास

कपिल देव, महेंद्रसिंग धोनी, रोहित शर्मा आणि सूर्यकुमार यादव या कर्णधारांनी वेगवेगळ्या काळात भारतीय क्रिकेटला जागतिक पातळीवर नवे शिखर गाठून दिले. त्यांच्या नेतृत्वामुळे भारताने केवळ विश्वचषक जिंकले नाहीत, तर जगातील सर्वात ताकदवान क्रिकेट संघांपैकी एक म्हणून आपली ओळख निर्माण केली आहे.