(संगमेश्वर / एजाज पटेल)
होळी सणानिमित्त मुंबई, पुणे, सांगली, कोल्हापूर तसेच इतर शहरांमधून मोठ्या संख्येने चाकरमानी गावी आले होते. दोन-तीन दिवस कुटुंबीयांसोबत सणाचा आनंद साजरा केल्यानंतर आता हे चाकरमानी पुन्हा आपल्या कामाच्या ठिकाणी परतू लागल्याने संगमेश्वर एसटी स्थानकात प्रवाशांची मोठी गर्दी उसळली आहे. परतीच्या प्रवासासाठी बसस्थानकात सकाळपासूनच प्रवाशांच्या लांबच लांब रांगा लागल्याचे चित्र पाहायला मिळत आहे.
होळी सणानंतर सुट्टी संपत आल्याने अनेकांनी एकाच वेळी प्रवास करण्यास सुरुवात केली आहे. त्यामुळे बसस्थानक परिसरात मोठी वर्दळ निर्माण झाली असून प्रवाशांना एसटी बस मिळवण्यासाठी मोठी कसरत करावी लागत आहे. विशेषतः मुंबई, पुणे, कोल्हापूर, सांगली आदी मार्गांवर जाणाऱ्या बससाठी प्रवाशांची सर्वाधिक गर्दी दिसून येत आहे.
अनेक एसटी बसेस वेळेवर येत नसल्याने प्रवाशांची मोठी गैरसोय होत आहे. काही बसेस उशिरा येत असून त्या आधीच प्रवाशांनी भरलेल्या अवस्थेत स्थानकात दाखल होत आहेत. त्यामुळे स्थानकावर थांबलेल्या प्रवाशांना बसमध्ये चढण्यासाठी धावपळ करावी लागत आहे. काही ठिकाणी बसमध्ये जागा मिळत नसल्याने प्रवाशांना पुढील बसची प्रतीक्षा करावी लागत आहे.
या गर्दीमध्ये लहान मुले, महिला तसेच वयोवृद्ध प्रवाशांचे विशेष हाल होत असल्याचे दिसून येत आहे. अनेकांना तासन्तास बसस्थानकात थांबावे लागत असल्याने प्रवाशांमध्ये नाराजीचे वातावरण निर्माण झाले आहे. काही प्रवासी कुटुंबासह प्रवास करत असल्याने त्यांना अधिक त्रास सहन करावा लागत आहे
दरम्यान, काही एसटी बसेस क्षमतेपेक्षा अधिक प्रवासी घेऊन धावत असल्याचेही दिसून येत आहे. प्रवाशांची वाढती संख्या आणि मर्यादित बससेवा यामुळे वाहतूक व्यवस्थेवर मोठा ताण निर्माण झाला आहे. सुट्टीच्या कालावधीत अतिरिक्त बसेसची व्यवस्था अपुरी पडत असल्याची भावना प्रवाशांकडून व्यक्त केली जात आहे.
होळी सण हा कोकणातील महत्त्वाचा सण मानला जातो. या सणासाठी मोठ्या संख्येने चाकरमानी आपल्या मूळ गावी येतात. सणानंतर मात्र सर्वजण एकाच वेळी परतीच्या प्रवासाला लागल्याने दरवर्षी अशी गर्दी निर्माण होत असल्याचे स्थानिकांचे म्हणणे आहे.
यामुळे प्रवाशांनी एसटी प्रशासनाने तातडीने अतिरिक्त फेऱ्या सुरू कराव्यात तसेच महत्त्वाच्या मार्गांवर जादा बसेस उपलब्ध करून द्याव्यात, अशी मागणी केली आहे. प्रवाशांची वाढती संख्या लक्षात घेऊन योग्य नियोजन केल्यास अशा प्रकारची गैरसोय टाळता येईल, अशी अपेक्षाही नागरिकांनी व्यक्त केली आहे.
