(पिंपरी / पुणे)
पिंपरी-चिंचवड महापालिका, पिंपरी-चिंचवड फिल्म सोसायटी आणि गाथा फिल्म सोसायटी यांच्या संयुक्त विद्यमाने ३ ते ५ मार्च २०२६ या कालावधीत भव्य आंतरराष्ट्रीय चित्रपट महोत्सव आयोजित करण्यात आला आहे. या महोत्सवात तब्बल ४३ देशांतील ११६ चित्रपट प्रेक्षकांसाठी विनामूल्य प्रदर्शित केले जाणार आहेत, अशी माहिती महापौर रवी लांडगे यांनी दिली.
हा चित्रपट महोत्सव आकुर्डी प्राधिकरण येथील ग. दि. माडगूळकर सभागृह येथे पार पडणार आहे. महोत्सवात भारतासह अमेरिका, युनायटेड किंगडम, फ्रान्स, जर्मनी, स्पेन, जपान, कॅनडा, ऑस्ट्रेलिया, रशिया, दक्षिण कोरिया, इराण, तुर्की, दक्षिण आफ्रिका, ब्राझील, अर्जेंटिना, ग्रीस आदी देशांतील चित्रपटांचा समावेश आहे.
लघुपट, माहितीपट ते दीर्घपट
या महोत्सवात लघुपट, माहितीपट, ॲनिमेशन आणि दीर्घपट अशा विविध प्रकारच्या चित्रपटांचे सादरीकरण होणार आहे. सर्व वयोगटातील प्रेक्षकांना केंद्रस्थानी ठेवून चित्रपटांची निवड करण्यात आली आहे. विज्ञान आणि अंधश्रद्धा, समाजव्यवस्था, पर्यावरण व निसर्ग, तंत्रज्ञान, प्रेम व मानवी भावना, आपत्ती व्यवस्थापन, तसेच महापुरुषांच्या जीवनावर आधारित विषय यामध्ये मांडण्यात आले आहेत.
याशिवाय शिक्षण, महिला सक्षमीकरण, लैंगिक समानता, युवा नेतृत्व, ग्रामीण विकास, सामाजिक न्याय, मानवाधिकार, आरोग्य व मानसिक स्वास्थ्य, बालहक्क, कला-संस्कृती संवर्धन, उद्योजकता, हवामान बदल, दिव्यांग सक्षमीकरण आणि जागतिक शांतता यांसारख्या सकारात्मक विषयांवर आधारित चित्रपटही प्रेक्षकांना पाहता येणार आहेत.
महापौर रवी लांडगे म्हणाले की, आंतरराष्ट्रीय चित्रपट महोत्सवामुळे पिंपरी-चिंचवड शहराच्या सांस्कृतिक जीवनाला नवी दिशा मिळेल. “चित्रपट हे केवळ मनोरंजन नसून समाजप्रबोधनाचे प्रभावी माध्यम आहे. विविध देशांतील दर्जेदार चित्रपटांच्या माध्यमातून नागरिकांना नवे विचार, नवी दृष्टी आणि जागतिक अनुभव मिळेल,” असा विश्वास त्यांनी व्यक्त केला.
हा महोत्सव चित्रपटप्रेमी, विद्यार्थी, अभ्यासक आणि सर्वसामान्य नागरिकांसाठी एक पर्वणी ठरणार आहे.
