(नवी दिल्ली)
उपमुख्यमंत्री अजित पवार यांच्या चार्टर विमान अपघातानंतर नागरी विमान वाहतूक महासंचालनालयाने (DGCA) देशातील चार्टर विमान कंपन्यांचे ‘स्पेशल ऑडिट’ करण्याचा मोठा निर्णय घेतला आहे. मात्र, या विशेष तपासणीत अपघातग्रस्त विमानाची मालकी असलेल्या व्हीआरएस व्हेंचर कंपनीला वगळण्यात आल्याने मोठे आश्चर्य व्यक्त केले जात आहे. याच कंपनीच्या विमानाच्या अपघातात अजित पवार यांचा मृत्यू झाल्याने या निर्णयावर प्रश्नचिन्ह उपस्थित होत आहे.
अजित पवार विमान अपघात प्रकरण देशभरात चर्चेत असताना डीजीसीएने चार्टर कंपन्यांच्या सुरक्षा व्यवस्थेची सखोल तपासणी करण्याचा निर्णय घेतला आहे. पहिल्या टप्प्यात देशातील १४ प्रमुख चार्टर विमान कंपन्यांचे स्पेशल ऑडिट करण्यात येणार असून, विमानांची तांत्रिक स्थिती, देखभाल पद्धती, इंजिन तपासणी, सुरक्षा मानके आणि नियमित तांत्रिक तपासण्या या मुद्द्यांवर विशेष भर दिला जाणार आहे.
डीजीसीएच्या आदेशानुसार पहिल्या टप्प्यात एअर चार्टर सर्व्हिसेस प्रा. लि., ए. आर. एअरवेज प्रा. लि., एरो एअरक्राफ्ट सेल्स अँड चार्टर, चिप्सन एव्हिएशन प्रा. लि., डेक्कन चार्टर प्रा. लि., ग्लोबल व्हेक्ट्रा हेलिकॉर्प लि., इंडो-पॅसिफिक एव्हिएशन प्रा. लि., इंडिया फ्लाय सेफ एव्हिएशन लि., कर्णावती एव्हिएशन प्रा. लि., पवन हंस लि., राजस एरोस्पोटर्स प्रा. लि., रेडबर्ड एअरवेज प्रा. लि., रिलायन्स कमर्शियल डिलर्स लि. आणि झेस्ट एव्हिएशन लि. या कंपन्यांचा समावेश करण्यात आला आहे.
मात्र, अजित पवार यांच्या विमान अपघातास कारणीभूत ठरलेल्या व्हीआरएस व्हेंचर या कंपनीचा या यादीत समावेश नसल्याने अनेकांकडून नाराजी व्यक्त होत आहे. अपघातानंतर सुरक्षेच्या दृष्टीने सर्वप्रथम संबंधित कंपनीची तपासणी होणे अपेक्षित असताना ती वगळण्यात आल्याने पारदर्शकतेबाबत प्रश्न उपस्थित केले जात आहेत.
दरम्यान, डीजीसीएने या विशेष ऑडिटसाठी स्वतंत्र पथक स्थापन केले असून, येत्या २५ फेब्रुवारीपर्यंत तपासणी अहवाल सादर करण्याचे आदेश देण्यात आले आहेत. या अहवालानंतर चार्टर विमान कंपन्यांच्या सुरक्षा मानकांबाबत पुढील कारवाईचा निर्णय घेतला जाणार आहे.
अजित पवार विमान अपघात प्रकरणामुळे देशातील चार्टर विमान सेवेच्या सुरक्षेबाबत व्यापक चर्चा सुरू झाली आहे. या पार्श्वभूमीवर डीजीसीएची भूमिका आणि विशेषतः व्हीआरएस व्हेंचरला वगळण्यामागील कारणे काय, याकडे सर्वांचे लक्ष लागले आहे. आगामी अहवालातून याबाबत अधिक स्पष्टता येण्याची शक्यता आहे.
