(मुंबई)
राज्याचे उपमुख्यमंत्री म्हणून विराजमान झालेल्या सुनेत्रा पवार यांना आणखी दोन महत्त्वाच्या जबाबदाऱ्या देण्यात आल्या आहेत. राज्य सरकारच्या नवीन आदेशानुसार, सुनेत्रा पवार आता बीड आणि पुणे या दोन्ही जिल्ह्यांच्या पालकमंत्री म्हणून काम पाहणार आहेत. या दोन्ही जिल्ह्यांची जबाबदारी पूर्वी महाराष्ट्राचे उपमुख्यमंत्री आणि वरिष्ठ नेते अजित पवार यांनी सांभाळली होती, पण त्यांच्या अपघाती निधनानंतर ही जबाबदारी आता सुनेत्रा पवार यांना सोपवण्यात आली आहे.
२८ जानेवारी रोजी मुंबईहून बारामतीकडे जात असताना विमान अपघातात अजित पवार यांचा दुर्दैवी अंत झाला. या अपघातात त्यांच्या सोबत असलेले सुरक्षा रक्षक, दोन पायलट आणि एक फ्लाइट अटेंडंट यांचाही मृत्यू झाला. या दुखद घटनेमुळे राज्यभर शोककळा पसरली आहे.
अजित पवार यांच्या अकाली निधनानंतर सरकारमध्ये त्यांच्याकडे असलेल्या जबाबदाऱ्यांचा प्रश्न निर्माण झाला होता. त्यामुळे राज्य प्रशासन विभागाने सुनेत्रा पवार यांना राज्य उत्पादन शुल्क, क्रीडा आणि युवक कल्याण आणि अल्पसंख्याक विकास अशी तीन महत्त्वाचे विभागीय खाती देण्याचा निर्णय घेतला आहे. तर नियोजन आणि वित्त विभागाचे दायित्व मुख्यमंत्री देवेंद्र फडणवीस यांनी स्वतःकडे ठेवले आहे.
बीड आणि पुणे या दोन्ही जिल्ह्यांमध्ये प्रशासन आणि विकासाची जबाबदारी सांभाळण्याचे आव्हान आता सुनेत्रा पवारांसमोर आहे. २०२५ च्या विधानसभा निवडणुकीनंतर बीड जिल्ह्याची जबाबदारी पहिल्यांदाच अजित पवारांकडे आली होती आणि ते सकारात्मक बदल घडविण्याच्या दिशेने काम करत होते. पुणे जिल्हा हा आर्थिक आणि सामाजिक दृष्टीने राज्यातील एक महत्त्वाचा केंद्रबिंदू आहे. त्यामुळे या दोन्ही जिल्ह्यांचा विकास आणि प्रलंबित प्रश्नांचा मार्ग काढण्याचे काम सुनेत्रा पवार यांच्याकडे असेल.
राज्य सरकारच्या सामान्य प्रशासन विभागाने आज ३ फेब्रुवारी रोजी यासंबंधी शासन निर्णय जारी केला आहे. स्रोतांच्या माहितीनुसार सुनेत्रा पवार ९ फेब्रुवारीला मंत्रालयीन कार्यालयात उपस्थित राहण्याची शक्यता आहे. उपमुख्यमंत्री अजित पवार यांचे कार्यकर्त्यांना न्याय देण्याच्या आणि राज्यभरातील योजनांचे प्रभावी मार्गदर्शन करण्याच्या कार्याची परंपरा आता सुनेत्रा पवार यांच्याकडे चालू राहणार आहे.
