(मुंबई)
मराठी रंगभूमीवर प्रचंड गाजलेले ‘तरुण तुर्क म्हातारे अर्क’ हे नाटक पुन्हा एकदा धुमाकूळ घालण्यासाठी रंगभूमीवर येत आहे. प्रा. मधुकर तोरडमल लिखित आणि राजेश देशपांडे दिग्दर्शित या नाटकाचा शुभारंभाचा प्रयोग मंगळवार ३० डिसेंबर रोजी दुपारी ठाणे येथील गडकरी रंगायतनमध्ये होत आहे. प्रियांका पेडणेकर, मधुरा पेडणेकर, योगिता गोवेकर, प्राची पारकर व विजया राणे या पाच महिलांनी मिळून या नाटकाची निर्मिती केली आहे.
या नाटकात अतुल तोडणकर, अभिजीत चव्हाण व नीता पेंडसे हे आजचे आघाडीचे कलावंत प्रमुख भूमिका साकारत आहेत. त्यांच्यासह चिंतन लांबे, सोहन नांदुर्डीकर, स्वानंद देसाई, निलेश देशपांडे, श्रुती पाटील हे कलाकारही या नाटकात विविध भूमिका रंगवत आहेत.
अनामिका व कौटुंबिक कट्टा निर्मित आणि साईसाक्षी प्रकाशित हे नाटक आता नव्या संचात रंगभूमीवर येत आहे. ३० डिसेंबर रोजी दुपारी गडकरी रंगायतन, ३१ डिसेंबर रोजी डॉ. काशिनाथ घाणेकर नाट्यगृह व १ जानेवारी २०२६ रोजी श्री शिवाजी मंदिरात या नाटकाचे शुभारंभाचे प्रयोग सादर होणार आहेत. राजेश देशपांडे यांनी या नाटकाचे दिग्दर्शन केले असून, नाटकाचे नेपथ्य संदेश बेंद्रे यांचे आहे. या नाटकाला तुषार देवल यांनी पार्श्वसंगीत दिले असून, प्रकाशयोजना श्याम चव्हाण यांची आहे. मंगल केंकरे यांनी वेशभूषेची जबाबदारी सांभाळली आहे. अशोक मुळ्ये व दिनू पेडणेकर हे या नाटकाचे सूत्रधार आहेत.
