(दापोली)
दापोलीमध्ये मागील २४ तासांत तब्बल ७.२ अंश सेल्सिअस इतके नीचांकी तापमान नोंदवत यंदाच्या हिवाळ्यातील सर्वात मोठा गारठा अनुभवला गेला आहे. ‘मिनी महाबळेश्वर’ म्हणून ओळखल्या जाणाऱ्या दापोलीने आपल्या जुन्या हिवाळी हंगामाची पुन्हा झलक दाखविल्याने शेतकरी, बागायतदार आणि पर्यटन व्यावसायिक सर्वांमध्ये उत्साहाचे वातावरण आहे.
हवेत वाढलेल्या गारठ्यामुळे आंबा व काजू बागायतदारांच्या आशा पुन्हा पल्लवीत झाल्या आहेत. गेल्या काही दिवसांपासून हवामान ढगाळ राहिल्याने मोहोर येण्याची प्रक्रिया मंदावली होती; परंतु तापमानातील घसरण पिकांच्या वाढीस पोषक ठरण्याची शक्यता व्यक्त केली जात आहे. यामुळे यंदाच्या हंगामात उत्पादनात सुधारणा होईल, असा विश्वास बागायतदारांनी व्यक्त केला आहे.
दापोलीतील सुखद, थंड हवामानामुळे पर्यटन क्षेत्रालाही नवी उभारी मिळणार आहे. सणासुदीच्या काळात वाढणारा पर्यटकांचा ओघ लक्षात घेता स्थानिक व्यावसायिकांनी ही तापमानातील घसरण पर्यटनासाठी वरदान ठरेल, असे सांगितले. येथील पर्यटन व्यावसायिकांच्या मते, थंड हवामानामुळे पर्यटकांचा मुक्काम वाढणार असून त्याचा थेट फायदा स्थानिक हॉटेल्स, रिसॉर्ट्स आणि वाहन व्यवसायांना होतो.
हवामानातील बदलामुळे स्थानिक नागरिकांचे मानसिक आरोग्यही अधिक स्थिर आणि समाधानकारक राहील, अशी अपेक्षा व्यक्त केली जात आहे. या हिवाळी गारव्यामुळे कृषि, पर्यटन आणि स्थानिक अर्थव्यवस्थेला दिलासा मिळून आगामी दिवस आशादायी ठरणार असल्याचे चित्र दिसत आहे.
