(संगमेश्वर / एजाज पटेल)
मुंबई–गोवा राष्ट्रीय महामार्गावरील संगमेश्वर एस.टी. स्थानक परिसरात रात्रीच्या वेळी वाढणारी वाहतूक कोंडी आता गंभीर स्वरूप धारण करत आहे. महामार्गावरील सुरू असलेली दुरुस्ती व रस्ता-विस्तारीकरणाची कामे, त्यात मालवाहतूक वाहनांची मोठी वर्दळ, तर दुसरीकडे प्रवासी वाहनांची अखंड ये-जा, या सर्वांचा मिळून परिणाम म्हणून रात्री उशिरापर्यंत वाहनांच्या लांबच लांब रांगा लागत आहेत.
संगमेश्वर एस.टी. स्टॅंडाजवळील चौक हे या संपूर्ण परिसराचे मध्यवर्ती ठिकाण आहे. मुंबई आणि गोवा दिशांना जाणाऱ्या वाहनांचा येथे नैसर्गिक ताण वाढतो. विशेषत: रात्रीच्या सुमारास, महामार्गावरील वाढत्या ट्रक-ट्रेलरची संख्या पाहता वाहतुकीचा ताण अनेक पटींनी वाढतो. रस्ता दुरुस्तीची कामे सुरू असल्यामुळे मार्ग अरुंद झाला असून थोड्याशा अडथळ्यानेही मोठ्या प्रमाणात कोंडी निर्माण होते.
यातील सर्वात गंभीर बाब म्हणजे रात्रीच्या वेळी चौकात पोलीस किंवा महामार्ग पोलीस यांची उपस्थिती जवळपास नसणे. त्यामुळे कोंडी सुटण्यासाठी कोणतेही अधिकृत नियंत्रण नसल्याने परिस्थिती अधिक बिघडते. याचा परिणाम असा की, प्रवासी आणि वाहनचालक यांनाच शेवटी उतरून वाहतूक सुरळीत करण्यासाठी स्वतःहून पुढे यावे लागत असल्याचे चित्र वेळोवेळी दिसून येते.
वाहतूक कोंडीमुळे केवळ प्रवाशांना त्रास होतो एवढेच नाही, तर रुग्णवाहिन्यांनाही मार्ग काढताना प्रचंड अडचणींना सामोरे जावे लागत आहे. कोंडीत अडकलेल्या रुग्णवाहिन्यांना संथगतीने पुढे सरकावे लागते, ज्यामुळे जीविताचा धोका वाढू शकतो, अशी गंभीर परिस्थिती निर्माण होत आहे. स्थानिक नागरिक तसेच वाहनचालकांनी अनेकदा या समस्येकडे प्रशासनाचे तोंडी लक्ष वेधले असले, तरी अद्याप ठोस उपाययोजना झालेली दिसत नाही.
नुकत्याच आलेल्या हंगामी पर्यटन आणि सणासुदीच्या गर्दीमुळे महामार्गावरील वाहतूक आणखी वाढली आहे. रात्रीच्या वेळी या चौकात वाहतुकीचे नियोजन, तात्पुरती पोलीस नियुक्ती, तसेच महामार्ग प्राधिकरणाने वाहतूक वळवाट किंवा तात्पुरती प्रकाशयोजना उभारण्याची गरज नागरिक व्यक्त करत आहेत.
स्थानिकांचे म्हणणे आहे की,“महामार्गावरील कामे सुरू असताना तरी वाहतूक पोलिसांची नियमित नेमणूक असायला हवी. रात्रीच्या वेळी कोणताही शासकीय कर्मचारी उपलब्ध नसल्याने सर्वसामान्यांना स्वतःच वाहतूक नियंत्रण करावे लागते, ही अतिशय धोकादायक आणि अस्वीकार्य बाब आहे.”
या वाढत्या समस्येकडे संबंधित विभागाने तातडीने लक्ष देत योग्य ती पावले उचलावीत, अशी एकमुखाने मागणी स्थानिक नागरीकांकडून करण्यात येत आहे. रात्रीच्या काळातील ही वाहतूक कोंडी सोडवण्यासाठी ठोस नियोजन न झाल्यास येत्या काळात परिस्थिती अधिक बिकट होण्याची शक्यता नाकारता येत नाही.
