(मुंबई)
राज्यातील स्थानिक स्वराज्य संस्थांच्या निवडणुकांसाठी उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेस (अजित पवार गट) यांनी गुरुवारी स्टार प्रचारकांची यादी जाहीर केली. या यादीत प्रवक्तेपदावरून हटवले गेलेले आमदार अमोल मिटकरी, विधानसभा निवडणुकीत पक्षातून हकालपट्टी झालेल्या माजी खासदार समीर भुजबळ आणि शेतकऱ्यांविषयी वादग्रस्त विधान केलेल्या अल्पसंख्याक विकास मंत्री माणिकराव कोकाटे यांचाही समावेश आहे. मात्र, प्रकृती कारणास्तव अन्न व नागरी पुरवठा मंत्री छगन भुजबळ यांना यादीत स्थान देण्यात आलेले नाही.
पक्षाचे प्रदेशाध्यक्ष सुनील तटकरे यांनी जाहीर केलेल्या या ४० सदस्यांच्या यादीत उपमुख्यमंत्री अजित पवार, राष्ट्रीय कार्याध्यक्ष खासदार प्रफुल्ल पटेल, सुनील तटकरे, वैद्यकीय शिक्षणमंत्री हसन मुश्रीफ, अन्न व औषध प्रशासन मंत्री नरहरी झिरवाळ, सहकार मंत्री बाबासाहेब पाटील, मदत व पुनर्वसन मंत्री मकरंद पाटील, कृषीमंत्री दत्तात्रय भरणे, विधानसभा उपाध्यक्ष अण्णा बनसोडे, महिला व बालविकास मंत्री अदिती तटकरे, पर्यटन राज्यमंत्री इंद्रनील नाईक, माजी मंत्री धनंजय मुंडे, धर्मरावबाबा आत्राम, अनिल भाईदास पाटील, माजी मंत्री संजय बनसोडे, नवाब मलिक आणि अभिनेते सयाजी शिंदे यांचा समावेश आहे.
तसेच, मौलाना आझाद अल्पसंख्याक आर्थिक विकास महामंडळाचे अध्यक्ष मुश्ताक अंतुले, आमदार सना मलिक, महिला प्रदेशाध्यक्षा रुपाली चाकणकर, आमदार इद्रीस नायकवडी, माजी आमदार अनिकेत तटकरे, झिशान सिद्दीकी, राजेंद्र जैन, मुंबई कार्याध्यक्ष सिद्धार्थ कांबळे, प्रदेश सरचिटणीस सूरज चव्हाण, लहू कानडे, ओबीसी सेलचे अध्यक्ष कल्याण आखाडे, सामाजिक सेलचे अध्यक्ष सुनील मगरे, अल्पसंख्याक सेलचे अध्यक्ष नाझेर काझी तसेच महेश शिंदे, राजलक्ष्मी भोसले, सुरेखा ठाकरे, नजीब मुल्ला, प्रतिभा शिंदे आणि विकास पासलकर यांचाही या यादीत समावेश करण्यात आला आहे.
दरम्यान, अलीकडेच छगन भुजबळ यांची शस्त्रक्रिया झाल्याने डॉक्टरांनी त्यांना महिनाभर विश्रांतीचा सल्ला दिला आहे. त्यामुळे ते या निवडणूक प्रचारात प्रत्यक्ष सहभागी होऊ शकणार नाहीत. त्यांच्या अनुपस्थितीत समीर भुजबळ हे स्टार प्रचारकाची जबाबदारी पार पाडतील, अशी माहिती सुनील तटकरे यांनी दिली.
