(मुंबई)
महाराष्ट्राचे राज्यपाल सी.पी. राधाकृष्णन यांची देशाचे उपराष्ट्रपती म्हणून निवड झाली असून, त्यांनी राज्यपालपदाचा राजीनामा दिला आहे. त्यांच्या जागी गुजरातचे राज्यपाल आचार्य देवव्रत यांच्याकडे महाराष्ट्राच्या राज्यपालपदाचा अतिरिक्त कार्यभार सोपविण्यात आला आहे. यासंदर्भात राष्ट्रपती द्रौपदी मुर्मू यांनी निवेदन जारी केले आहे.
उपराष्ट्रपतीपदाची निवडणूक
राधाकृष्णन हे राष्ट्रीय लोकशाही आघाडीचे (रालोआ) उमेदवार म्हणून उपराष्ट्रपतीपदाची निवडणूक लढले. त्यांनी इंडिया आघाडीचे उमेदवार माजी न्यायमूर्ती बी. सुदर्शन रेड्डी यांचा पराभव करून विजय मिळविला. उपराष्ट्रपती म्हणून निवड झाल्यामुळे त्यांनी महाराष्ट्राच्या राज्यपालपदाचा राजीनामा दिला. सी. पी. राधाकृष्णन महाराष्ट्राच्या राज्यपाल पदाच्या जबाबदारीतून मुक्त झाल्याने राष्ट्रपतींनी गुजरातचे राज्यपाल आचार्य देवव्रत यांना त्यांच्या स्वतःच्या विद्यमान कर्तव्यांसोबतच महाराष्ट्राचे राज्यपाल म्हणून जबाबदारी पार पाडण्यासाठी नियुक्त केले आहे.
आचार्य देवव्रत यांच्याकडे अतिरिक्त जबाबदारी
राष्ट्रपतींच्या आदेशानुसार गुजरातचे राज्यपाल आचार्य देवव्रत हे महाराष्ट्राचेही राज्यपालपदाचा कार्यभार सांभाळणार आहेत. देवव्रत हे मूळ हरियाणातील समालखा येथील असून, गुजरातचे राज्यपाल होण्यापूर्वी त्यांनी हिमाचल प्रदेशाचे राज्यपाल म्हणून काम पाहिले आहे.
