(चिपळूण)
तालुक्यातील तुरंबव फाट्याजवळ झालेल्या एका भीषण अपघातात १७ वर्षीय मुलीचा दुर्दैवी मृत्यू झाला असून तिचे वडील गंभीर जखमी झाले आहेत. ही घटना गुरुवार, दि. ४ सप्टेंबर रोजी सायंकाळी सहाच्या सुमारास घडली.
मिळालेल्या माहितीनुसार, प्रशांत कृष्णाजी पंडित (वय ५०, रा. तुरंबव, चिपळूण) हे त्यांची मॅक्स गाडी (क्र. एमएच १० इ ७९४०) घेऊन मांडकीहून तुरंबवकडे जात होते. दरम्यान, समोरून येणाऱ्या एका टर्नर कंपनीच्या दुचाकीने (क्र. एमएच २ बीसी १२२५) त्यांच्या गाडीला जोरदार धडक दिली.
ही दुचाकी निलेश विनायक नाचरे (वय ४७, रा. निवळी, चिपळूण) चालवत होते. त्यांनी रस्त्याची परिस्थिती न पाहता निष्काळजीपणे वाहन चालवल्यामुळे हा अपघात झाल्याची नोंद करण्यात आली आहे. धडक इतकी जबरदस्त होती की, दुचाकीवर मागे बसलेल्या त्यांच्या १७ वर्षीय मुलीचा जागीच मृत्यू झाला. तर निलेश नाचरे स्वतःही गंभीर जखमी झाले असून त्यांच्यावर उपचार सुरू आहेत.
या धडकेत मॅक्स आणि दुचाकी या दोन्ही वाहनांचे मोठे नुकसान झाले. अपघातानंतर घटनास्थळी मोठी गर्दी जमली होती.
याप्रकरणी मॅक्स चालक प्रशांत पंडित यांनी सावर्डे पोलिसांत फिर्याद दाखल केली आहे. त्यानुसार, आरोपी निलेश नाचरे यांच्याविरुद्ध भारतीय न्यायसंहिता अधिनियम २०२३ चे कलम १०६(१), २८१, १२५(अ), १२५(ब) तसेच मोटार वाहन कायदा कलम १८४ अंतर्गत गुन्हा नोंदविण्यात आला आहे. या दुर्दैवी घटनेमुळे परिसरात हळहळ व्यक्त होत आहे.
