(मुंबई)
राज्यातील होमिओपॅथी डॉक्टरांसाठी महत्त्वाचा निर्णय घेत, राज्य सरकारने सीसीएमपी कोर्स पूर्ण केलेल्या डॉक्टरांची नोंद महाराष्ट्र वैद्यक परिषदेच्या (एमएमसी) स्वतंत्र नोंदवहीत करण्याचे आदेश जारी केले आहेत. या निर्णयामुळे राज्यातील जवळपास एक लाख होमिओपॅथी डॉक्टरांना दिलासा मिळाला असून, त्यांना मर्यादित स्वरूपात आधुनिक औषधोपचार करण्याचा मार्ग मोकळा झाला आहे.
२०१४ मध्ये राज्य शासनाने होमिओपॅथी डॉक्टरांसाठी आधुनिक औषधशास्त्रावर आधारित प्रमाणपत्र अभ्यासक्रम – सीसीएमपी (Certificate Course in Modern Pharmacology) सुरू केला होता. या कोर्सचा उद्देश ग्रामीण व दुर्गम भागातील प्राथमिक आरोग्य सेवा सक्षम करणे हा होता. यासंदर्भात ३० जून २०२५ रोजी सरकारने आदेश काढून, हा कोर्स पूर्ण केलेल्या डॉक्टरांची नोंद महाराष्ट्र वैद्यक परिषदेकडे करण्याचे निर्देश दिले होते.
याचिका व न्यायालयाचा निकाल : सरकारच्या या निर्णयाला इंडियन मेडिकल असोसिएशन (आयएमए), पुणे शाखेने मुंबई उच्च न्यायालयात आव्हान दिले होते. मात्र, उच्च न्यायालयाने याचिकाकर्त्यांचा दावा फेटाळत, राज्य सरकारच्या निर्णयावर स्थगिती देण्यास नकार दिला.
सरकारचा अंतिम आदेश : न्यायालयाचा निकाल लक्षात घेऊन वैद्यकीय शिक्षण व औषधी द्रव्य विभागाने शुक्रवारी अधिकृत आदेश जारी केले. यानुसार सीसीएमपी उत्तीर्ण होमिओपॅथी डॉक्टरांची नोंदणी आता एमएमसीच्या स्वतंत्र नोंदवहीत केली जाणार आहे. यापूर्वी होमिओपॅथी विरुद्ध अॅलोपॅथी असा संघर्षही उफाळला होता. तथापि, नव्या आदेशामुळे राज्यातील एक लाख होमिओपॅथी डॉक्टरांना दिलासा मिळाला असून, विविध संघटनांनी या निर्णयाचे स्वागत केले आहे.
“शेवटी सत्याचा विजय” : होमिओपॅथी परिषदेचे प्रशासक डॉ. बाहुबली शहा म्हणाले, “आज महाराष्ट्र शासनाने ११ जुलै रोजी काढलेले परिपत्रक मागे घेतले असून, सीसीएमपी उत्तीर्ण डॉक्टरांचे नाव महाराष्ट्र वैद्यक परिषदेत नोंदवले जाणार आहे. शेवटी सत्याचा विजय होतो, याचा प्रत्यय पुन्हा एकदा आला आहे. राज्यातील सर्व होमिओपॅथी डॉक्टरांचे अभिनंदन.”
