(नवी मुंबई)
नवी मुंबईतील उरण परिसरात अवैध संबंधांच्या संशयातून पतीने पत्नीला जिवंत जाळून ठार मारल्याची धक्कादायक घटना उघडकीस आली आहे. आरोपीने ही आत्महत्या असल्याचा खोटा दावा करून पोलिसांची दिशाभूल करण्याचा प्रयत्न केला; मात्र सात वर्षीय मुलीच्या जबाबामुळे त्याचे खोटे उघड झाले. ही घटना २५ ऑगस्ट रोजी पहाटे पागोटेगाव येथे घडली. दुसऱ्या दिवशी म्हणजेच २६ ऑगस्ट रोजी आरोपीला अटक करण्यात आली.
उरण पोलिस ठाण्याचे वरिष्ठ निरीक्षक हनीफ मुलानी यांनी दिलेल्या माहितीनुसार, आरोपी राजकुमार रामशिरोमणी साहू (३५) याला पत्नी जगराणी राजकुमार साहू (३२) हिच्यावर अवैध संबंध असल्याचा संशय होता. या संशयातून त्याने पत्नीवर ज्वलनशील पदार्थ टाकून तिला पेटवून दिले. गंभीर भाजलेल्या अवस्थेत तिला रुग्णालयात दाखल करण्यात आले, परंतु डॉक्टरांनी तपासून तिला मृत घोषित केले.
घटनेनंतर आरोपीने पोलिसांना सांगितले की, त्याची पत्नी स्वतःला घराच्या खोलीत कोंडून आत्महत्या केली. त्यामुळे सुरुवातीला अपघाती मृत्यूची नोंद करण्यात आली होती. मात्र तपासादरम्यान पोलिसांना त्याच्या कथेत तफावत जाणवली. याचवेळी या जोडप्याच्या सात वर्षीय मुलीने स्पष्ट जबाब दिला की, तिच्या वडिलांनीच आईला जाळून मारले.
याशिवाय परिसरातील सीसीटीव्ही फुटेजमध्ये घटनेनंतर आरोपी घराबाहेर जाताना दिसून आला. हा महत्त्वपूर्ण पुरावा ठरला आणि त्याचा दावा खोटा असल्याचे समोर आले. पोस्टमॉर्टेम रिपोर्ट, फॉरेन्सिक तपासणी आणि प्रत्यक्षदर्शींच्या जबाबांच्या आधारे पोलिसांनी हा प्रकार खून असल्याचे निश्चित केले.
२६ ऑगस्ट रोजी उरण पोलिसांनी आरोपीविरुद्ध भारतीय दंड संहितेच्या कलम ३०२ (खून) अंतर्गत गुन्हा दाखल करून त्याला अटक केली.
