(दापोली)
तालुक्यातील मुसळधार पावसामुळे आणि वादळसदृश्य परिस्थितीमुळे आंजर्ले-अडखळ खाडीत उभी असलेली ‘विघ्नहर्ता’ ही मासेमारी नौका (क्र. IND-MH-4-MM-482) दि. १८ रोजी दुपारी जलसमाधीला गेली. या दुर्घटनेत नौकेचे मालक किसन लक्ष्मण कुलाबकर (रा. हर्णे) यांना अंदाजे १० लाखांचे आर्थिक नुकसान झाले आहे.
खाडीत सुरक्षिततेसाठी उभी ठेवलेली नौका पावसामुळे अचानक वाढलेल्या पाण्याच्या जोरदार प्रवाहामुळे कलंडली. त्यानंतर नौकेचा तळ फुटून आत पाणी शिरले आणि काही क्षणातच ती पूर्णतः नादुरुस्त झाली.
कुलाबकर यांची ही एकमेव नौका असून तिच्यावरच त्यांच्या कुटुंबाचे उपजीविकेचे साधन अवलंबून होते. “पारंपरिक मच्छीमार म्हणून कसाबसा व्यवसाय सांभाळत असताना अशी दुर्घटना घडल्याने आमचे भविष्यच अंधारमय झाले आहे,” अशी खंत कुलाबकर यांनी व्यक्त केली.
या घटनेची पाहणी करून पंचनामा मत्स्यविभागाच्या परवाना अधिकारी दीप्ती साळवी यांनी केला आहे.
