(लडाख)
भारतीय सैन्यदलासाठी बुधवारची सकाळ अत्यंत दुःखद ठरली. सकाळी साडेअकराच्या सुमारास सैनिकांचा ताफा लडाखच्या गलवान खोऱ्यातील चारबाग भागातील फायरिंग रेंजकडे निघाला होता. त्यावेळी अचानक भूस्खलन झाले आणि मोठ्या प्रमाणात खडक आणि मोठे दगड सैन्याच्या गाडीवर कोसळले. लेहपासून सुमारे २०० किमी अंतरावर असलेल्या गलवानमधील दुर्बुकजवळील चारबाग येथे हा अपघात झाला. या भीषण घटनेत अनेक गाड्यांचा चुराडा झाला आणि त्यात एका गाडीतून प्रवास करणारे हिमाचलचे लेफ्टनंट कर्नल भानु प्रताप सिंह मनकोटिया व गुरुदासपूरचे लान्स दफादार दलजीत सिंह जागीच शहीद झाले. या दुर्घटनेत तीन सैनिक गंभीर जखमी झाले आहेत.
लेफ्टनंट कर्नल भानु प्रताप सिंह हे केवळ ३३ वर्षांचे होते. ते हिमाचल प्रदेशातील कांगडा जिल्ह्यातील शाहपूरचे रहिवासी होते. सध्या ते आपल्या कुटुंबासोबत पठाणकोटच्या अबरोल नगर येथे वास्तव्यास होते. त्यांच्या कुटुंबात पत्नीसह दीड वर्षांचा मुलगा व्योम आहे.
भानु प्रताप सिंह यांनी भारतीय सैन्याच्या १४ हॉर्स रेजिमेंटमध्ये सेवा बजावली होती. नुकतेच, जून २०२५ मध्ये त्यांना लेफ्टनंट कर्नल पदावर बढती मिळाली होती. सैनिकी जीवनाच्या सुरुवातीला त्यांनी इंडियन मिलिटरी अकादमी (IMA), डेहराडून येथे प्रशिक्षण पूर्ण केले होते. त्यांच्या अद्वितीय नेतृत्वगुणांमुळे आणि विशेष क्षमतांमुळे त्यांना प्रशिक्षणादरम्यान ‘स्वॉर्ड ऑफ ऑनर’ आणि ‘गोल्ड मेडल’ या मानाच्या सन्मानांनी गौरविण्यात आले होते.
या अपघातानंतर संपूर्ण देशभरातून शोक व्यक्त करण्यात येत आहे. “भानु प्रताप सिंह आणि दलजीत सिंह यांच्या कुटुंबियांच्या दुःखात आम्ही सहभागी आहोत,” अशा भावना नागरिक व विविध सामाजिक संघटनांकडून व्यक्त होत आहेत. सैन्यातील अधिकाऱ्यांनी श्रद्धांजली अर्पण करताना सांगितले की, “भानु प्रताप सिंह हे एक शूर आणि कर्तव्यनिष्ठ अधिकारी होते. त्यांच्या कामगिरीने नेहमीच प्रेरणा दिली आहे. त्यांचे बलिदान व्यर्थ जाणार नाही.”
