(दापोली)
शहरात सुरु असलेल्या मुसळधार पावसामुळे फॅमिली माळ परिसरात गुरुवारी सायंकाळी संरक्षक भिंतीचा काही भाग कोसळल्याची घटना घडली. या दुर्घटनेत सुदैवाने कोणतीही जीवितहानी झाली नसली तरी मकबुल कासम कोंडविलकर यांच्या घराला थेट धोका निर्माण झाला असून, त्यांनी स्थलांतराची तयारी दर्शवली आहे.
फॅमिली माळ परिसरात दरवर्षी दरडी कोसळण्याच्या घटना घडत असतानाही प्रशासनाकडून अद्याप ठोस उपाययोजना झालेली नसल्याने नागरिकांत संताप व्यक्त होत आहे. गुरुवारी सायंकाळी सुमारे ६ वाजण्याच्या सुमारास झालेल्या भिंत कोसळण्याच्या प्रकारामुळे या भागातील धोक्याचे प्रमाण अधिकच वाढले आहे. कोंडविलकर यांच्या घरास लागून असलेल्या संरक्षक भिंतीचा भाग कोसळल्याने त्यांच्या घराच्या पाया जवळच मातीचा मोठा ढिगारा झाला असून, संभाव्य धोक्याच्या पार्श्वभूमीवर त्यांनी तात्काळ मदतीची मागणी केली आहे.
स्थानिक नागरिकांचा प्रशासनावर रोष; दरडी कोसळण्याचा धोका कायम
घटनेनंतर परिसरातील नागरिकांनी घटनास्थळी धाव घेतली असून, प्रशासनाने तातडीने बचाव आणि प्रतिबंधात्मक उपाययोजना कराव्यात, अशी जोरदार मागणी केली आहे. या परिसरात वारंवार होणाऱ्या दुर्घटनांचा आढावा घेऊन आपत्ती व्यवस्थापन पथकाने तात्काळ भेट देऊन योग्य ती कारवाई करावी, अशी अपेक्षा व्यक्त होत आहे. या भागातील भौगोलिक रचना, मातीची सैल संरचना आणि मुसळधार पावसामुळे दरडी कोसळण्याचा धोका कायम असून, संरक्षक भिंतींच्या मजबुतीकरणासाठी त्वरित उपाययोजना आवश्यक असल्याचे स्थानिकांनी स्पष्ट केले आहे.
