(पुणे)
राज्य सामाईक प्रवेश परीक्षा कक्ष (सीईटी सेल)ने राज्यातील अभियांत्रिकी, तंत्रज्ञान (चार वर्षे कालावधी) आणि एकात्मिक अभियांत्रिकी पदवी अभ्यासक्रम (पाच वर्षे कालावधी), तसेच एमबीए आणि एमसीए पदवी अभ्यासक्रमांसाठीच्या प्रवेश प्रक्रियेचे वेळापत्रक शुक्रवारी जाहीर केले.
प्रथम वर्षाच्या प्रवेशासाठी आज २८ जून ते ८ जुलै २०२५ या कालावधीत ऑनलाइन अर्ज नोंदणी करता येणार आहे. अर्ज भरल्यानंतर २९ जून ते ९ जुलै या कालावधीत विद्यार्थ्यांनी आवश्यक कागदपत्रांची पडताळणी करणे आवश्यक आहे. यासाठी ई-स्क्रुटिनी, सुविधा केंद्रे, आणि छाननी केंद्रे यांसारखे पर्याय उपलब्ध करून देण्यात आले आहेत. मात्र, केंद्रांवर प्रत्यक्ष भेटीपूर्वी ऑनलाइन वेळ निश्चित करणे आवश्यक आहे. ८ जुलैनंतर केलेली नोंदणी व ९ जुलैनंतर पूर्ण केलेले अर्ज केवळ ‘नॉन-कॅप’ (स्वतंत्र संस्था) जागांसाठीच ग्राह्य धरले जाणार आहेत.
प्रवेश प्रक्रियेचे टप्पे:
- तात्पुरती गुणवत्ता यादी: १२ जुलै २०२५
- हरकती/आक्षेप नोंदणी कालावधी: १३ ते १५ जुलै
- अंतिम गुणवत्ता यादी: १७ जुलै २०२५
एमबीए आणि एमसीए अभ्यासक्रमांसाठीही जाहीर वेळापत्रक
एमबीए (व्यवस्थापनशास्त्र पदव्युत्तर पदवी) आणि एमसीए (संगणक अनुप्रयोग पदव्युत्तर पदवी) अभ्यासक्रमांसाठीसुद्धा प्रवेश प्रक्रिया आज २८ जूनपासून सुरू होत आहे. यासाठीचे टप्पे अभियांत्रिकी प्रवेश प्रक्रियेप्रमाणेच आहेत:
- नोंदणी कालावधी: २८ जून ते ८ जुलै
- कागदपत्र पडताळणी: ३० जून ते ९ जुलै
- तात्पुरती गुणवत्ता यादी: १२ जुलै
- हरकती कालावधी: १३ ते १५ जुलै
- अंतिम गुणवत्ता यादी: १७ जुलै
विद्यार्थ्यांनी अधिक माहितीसाठी अधिकृत संकेतस्थळावर भेट द्यावी:
सूचना: प्रवेश प्रक्रियेत कोणतीही अडचण येऊ नये यासाठी वेळापत्रकाची काटेकोरपणे अंमलबजावणी करावी आणि आवश्यक कागदपत्रे वेळेत सादर करावीत, असे कळविण्यात आले आहे.
