राज्यातील 24 IPS पोलीस अधिकाऱ्यांच्या बदल्या; अशोक खरात प्रकरणाची चर्चा पुन्हा रंगली

( मुंबई )

महाराष्ट्र सरकारने राज्यातील पोलीस दलातील 24 वरिष्ठ अधिकाऱ्यांच्या बदल्यांचे आदेश जारी केले असून, त्यामध्ये नाशिक परिक्षेत्राचे पोलीस महानिरीक्षक दत्ता कराळे यांचीही बदली करण्यात आली आहे. दत्ता कराळे यांची आता महाराष्ट्र राज्य मानवी हक्क आयोग येथे विशेष पोलीस महानिरीक्षक म्हणून नियुक्ती करण्यात आली आहे. दरम्यान, त्यांच्या या बदलीमागे कथित भोंदूबाबा अशोक खरात प्रकरणातील आरोप कारणीभूत ठरल्याची चर्चा राजकीय आणि पोलीस वर्तुळात सुरू झाली आहे.

अशोक खरातच्या कार्यक्रमातील उपस्थितीवरून वाद

नाशिकचे आयजी असताना दत्ता कराळे यांनी अशोक खरातच्या एका कार्यक्रमाला उपस्थिती लावल्याचा व्हिडीओ आणि फोटो सोशल मीडियावर व्हायरल झाले होते. सामाजिक कार्यकर्त्या अंजली दमानिया यांनी हे फोटो आणि व्हिडीओ शेअर करत गंभीर प्रश्न उपस्थित केले होते. “भोंदूबाबा अशोक खरातच्या कार्यक्रमात IG दत्ता कराळे का गेले?” असा सवाल अंजली दमानिया यांनी सार्वजनिकपणे केला होता. इतकंच नव्हे तर दत्ता कराळे यांनी त्या कार्यक्रमात भाषणही केल्याचं समोर आलं होतं.

‘18 वेळा फोनवर संवाद’ असल्याचा दावा

अंजली दमानिया यांनी दत्ता कराळे आणि अशोक खरात यांच्यात तब्बल 18 वेळा फोनवर संवाद झाल्याचा दावाही केला होता. या दाव्यानंतर राज्यातील राजकीय वातावरण तापलं होतं. विरोधकांकडूनही या प्रकरणात चौकशीची मागणी करण्यात आली होती. दमानिया यांनी पोलीस महासंचालक सदानंद दाते यांना या प्रकरणात हस्तक्षेप करण्याचे आवाहन केले होते. तसेच दत्ता कराळे यांच्या भूमिकेची सखोल चौकशी व्हावी, अशी मागणीही त्यांनी केली होती.

राज्यातील मोठ्या प्रमाणावर प्रशासकीय फेरबदल

राज्य सरकारकडून करण्यात आलेल्या या बदल्यांमध्ये विविध परिक्षेत्रातील वरिष्ठ पोलीस अधिकाऱ्यांचा समावेश आहे. आगामी कायदा-सुव्यवस्था, प्रशासकीय कामकाज आणि संवेदनशील प्रकरणांच्या पार्श्वभूमीवर हा मोठा फेरबदल मानला जात आहे. दत्ता कराळे यांच्या बदलीनंतर नाशिक परिक्षेत्रात नवीन पोलीस महानिरीक्षक कोण असणार याकडेही लक्ष लागले आहे.

अशोक खरात प्रकरणामुळे आधीच राज्यात खळबळ

कथित भोंदूबाबा अशोक खरात याच्याविरोधात विविध आरोप समोर आल्यानंतर राज्यभरात मोठी चर्चा रंगली होती. त्याच्या कार्यक्रमांना राजकीय आणि प्रशासकीय क्षेत्रातील काही व्यक्ती उपस्थित राहत असल्याचे आरोप झाल्याने हे प्रकरण अधिकच चर्चेत आले होते. या पार्श्वभूमीवर आता दत्ता कराळे यांच्या बदलीची चर्चा सुरू झाली असून, सरकारच्या या निर्णयामागे अशोक खरात प्रकरणातील वाद कारणीभूत ठरल्याची चर्चा पोलीस आणि राजकीय वर्तुळात रंगली आहे.