(दापोली)
समाजमाध्यमाद्वारे ओळख करून दापोली तालुक्यातील एका अल्पवयीन मुलीला एका फार्म हाऊसमध्ये नेऊन तिला शीतपेयामधून गुंगीचे औषध देऊन तिच्यावर अत्याचार केल्याचा खळबळजनक प्रकार समोर आला आहे. या प्रकरणी चिपळुणातील एका तरुणाला दापोली पोलिसांनी अटक केली आहे. अझहर कडवळकर असे तरुणाचे नाव आहे.
त्याने दापोली तालुक्यातील एका मुलीला ती अल्पवयीन असताना तिच्याशी समाजमाध्यमाद्वारे ओळख केली. तिला एप्रिल २०२२ मध्ये चिपळूण येथील एका फार्महाऊसवर घेऊन गेला व तिथे तिला शीतपेय पिण्यास दिले. त्यानंतर गुंगी आल्याचा फायदा घेऊन त्याने या मुलीशी शरीरसंबंध केले व त्याचे फोटोही काढले. त्यानंतर हे फोटो समाजमाध्यमावर टाकेन, अशी धमकी देऊन तिला गुहागर व मुरुड येथील लॉजवर नेऊन तिच्याशी अतिप्रसंग केल्याचे फिर्यादीत म्हटले आहे. समाजमाध्यमावर ओळख झाली तेव्हा अझहर याने वेगळेच नाव सांगितले होते. मात्र, या मुलीला त्याचे खरे नाव समजताच तिने त्याच्याबरोबर जाण्यास नकार दिला.
याबाबत फिर्याद दिल्यानंतर दापोली पोलिस स्थानकात बालकांचे लैंगिक अपराधापासून संरक्षण अधिनियम २०१२ च्या विविध कलमांनुसार तसेच भारतीय न्याय संहितेच्या कलमानुसार गुन्हा दाखल करून त्याला अटक केली आहे. त्याला न्यायालयासमोर हजर केले असता प्रथम पोलिस कोठडी देण्यात आली व ती संपल्यावर त्याला न्यायालयीन कोठडी सुनावण्यात आली आहे. अधिक तपास उपनिरीक्षक ज्योती चव्हाण करीत आहेत. या मुलीने तक्रारीत संशयिताचे नाव अझहर कडवळकर असे दिले होते. मात्र, तपासात ते अझहर कडवईकर असे निष्पन्न झाले असल्याची माहिती तपास अधिकारी यांनी दिली आहे.
