(मंडणगड / रत्नागिरी)
दि बुद्धिस्ट सोसायटी ऑफ इंडिया अर्थात भारतीय बौद्ध महासभेच्या वतीने धम्म चळवळीला गती देण्यासाठी आणि धम्म संस्कार रुजवण्यासाठी मंडणगड तालुक्यात भव्य ‘बौद्धाचार्य श्रमणेर शिबिराचे’ आयोजन करण्यात आले आहे. भारतीय बौद्ध महासभा तालुका शाखा मंडणगड, सर्व ग्रामशाखा आणि समता सैनिक दल बटालियन यांच्या संयुक्त विद्यमाने हा ऐतिहासिक सोहळा रविवार, १ नोव्हेंबर ते १० नोव्हेंबर २०१६ या कालावधीत भारतरत्न डॉ. बाबासाहेब आंबेडकर यांचे मूळ गाव असलेल्या आंबडवे येथील राष्ट्रीय स्मारकात संपन्न होणार आहे.
ऐतिहासिक आंबडवे भूमीत होणार प्रव्रज्या विधी
भारतीय बौद्ध महासभेचे संस्थापक बोधिसत्व डॉ. बाबासाहेब आंबेडकर यांच्या पावन जन्मभूमी-परंपरेशी जोडलेल्या आंबडवे नगरीत हा सोहळा होत असल्याने बौद्ध बांधवांमध्ये प्रचंड उत्साह आहे. रविवार, १ नोव्हेंबर रोजी सायंकाळी ठीक ४:०० वाजता महासभेच्या प्रमुख पदाधिकाऱ्यांच्या उपस्थितीत या शिबिराचा शानदार उद्घाटन सोहळा पार पडेल. याप्रसंगी पूज्य भन्ते डॉ. सुमेध बोधी ए. यांच्या पावन उपस्थितीत मुख्य ‘प्रव्रज्या विधी’ संस्कार पार पडणार आहे.
या सोहळ्याचे उद्घाटन भारतीय बौद्ध महासभेचे रत्नागिरी जिल्हाध्यक्ष अनंत सावंत आणि मंडणगड तालुकाध्यक्ष हर्षद जाधव यांच्या हस्ते होणार आहे. कार्यक्रमाच्या अध्यक्षस्थानी संस्कार मंडणगडचे उपाध्यक्ष आद. शैलेश पवार भूषवणार असून, सूत्रसंचालन जिल्हा सचिव (संस्कार) डॉ. अल्पेश सकपाळ करणार आहेत.
भारतीय बौद्ध महासभेच्या केंद्रीय व जिल्हा कार्यकारिणीच्या मार्गदर्शनाखाली आयोजित या सोहळ्याला जिल्हा सरचिटणीस एन. बी. कदम, जिल्हा कोषाध्यक्ष प्रदिप जाधव, ज्येष्ठ समाजसेवक दादासाहेब मर्चंडे, तसेच महासभेचे स्थानिक, तालुका व ग्रामशाखेचे सर्व सन्माननीय पदाधिकारी, कार्यकर्ते आणि समता सैनिक दलाचे जवान उपस्थित राहून नियोजनाची जबाबदारी सांभाळत आहेत. भारतीय बौद्ध महासभेच्या वतीने आयोजित या १० दिवसीय निवासी शिबिराचा व धम्म सोहळ्याचा लाभ घेण्यासाठी देश-परदेशातील आणि महाराष्ट्रातील तमाम उपासक-उपासिकांनी मोठ्या संख्येने उपस्थित राहावे, असे आवाहन महासभेच्या वतीने करण्यात आले आहे.
