(संगमेश्वर / एजाज पटेल)
संगमेश्वर तालुक्यातील फुणगूस खाडीभागातील एका ग्रामपंचायतीचा कारभार विविध कारणांमुळे चर्चेत असतानाच, जलजीवन मिशनअंतर्गत विहिरींच्या कामांबाबत गंभीर प्रश्न उपस्थित झाले आहेत. केंद्र आणि राज्य सरकारच्या महत्त्वाकांक्षी जलजीवन मिशन योजनेअंतर्गत संबंधित गावात तीन विहिरी पूर्ण झाल्याची माहिती पाणीपुरवठा विभागाकडून देण्यात येत आहे. स्थानिक प्रशासनानेही तीन विहिरींची कामे पूर्ण झाल्याचे सांगितले आहे. मात्र, प्रत्यक्ष पाहणीत पाणीटंचाई असलेल्या तीन वाड्यांपैकी केवळ दोन वाड्यांमध्येच विहिरी झाल्याचे समोर आल्याचा दावा ग्रामस्थांकडून करण्यात येत आहे. त्यामुळे तिसरी विहीर नेमकी कुठे आहे, असा प्रश्न उपस्थित झाला आहे.
पाण्यासाठी ग्रामस्थांची वणवण; कागदोपत्री मात्र तीन विहिरी
फुणगूस खाडीभागातील संबंधित ग्रामपंचायतीच्या काही वाड्यांमध्ये अद्यापही तीव्र पाणीटंचाईची समस्या कायम आहे. पिण्याच्या पाण्यासाठी महिलांसह ग्रामस्थांना संघर्ष करावा लागत आहे. या समस्येवर उपाय म्हणून जलजीवन मिशनअंतर्गत पाणीपुरवठा योजनेला मंजुरी देण्यात आली होती. या योजनेत गावातील तीन विहिरींच्या कामांची नोंद असल्याचे सांगण्यात येत आहे. मात्र, ग्रामस्थांनी प्रत्यक्ष जागेवर पाहणी केली असता दोनच वाड्यांमध्ये विहिरी आढळल्याचा दावा केला आहे. त्यामुळे योजनेतील कामांच्या नोंदी आणि प्रत्यक्ष परिस्थिती यामध्ये तफावत असल्याचा मुद्दा ऐरणीवर आला आहे.
तिसऱ्या विहिरीचे अस्तित्वच नसल्याचा ग्रामस्थांचा दावा
प्रशासकीय माहितीनुसार तिसऱ्या वाडीतही विहिरीचे काम पूर्ण झाले आहे. मात्र, संबंधित वाडीतील ग्रामस्थांच्या म्हणण्यानुसार, त्यांच्या वाडीच्या हद्दीत किंवा परिसरात जलजीवन मिशनअंतर्गत कोणतीही विहीर खोदण्यात आलेली नाही. तसेच विहिरीचे बांधकामही झालेले नाही. त्यामुळे प्रत्यक्षात विहीर नसताना तिची नोंद पूर्ण झालेल्या कामांमध्ये कशी करण्यात आली, असा सवाल उपस्थित केला जात आहे.
या विहिरीसाठी मंजूर करण्यात आलेला निधी, कामाची नोंद, प्रत्यक्ष अंमलबजावणी आणि काम पूर्ण झाल्याची नोंद यांची पडताळणी करण्याची मागणी आता होत आहे. मात्र, या प्रकरणातील नेमकी वस्तुस्थिती अधिकृत चौकशीनंतरच स्पष्ट होऊ शकेल.
सखोल चौकशीची ग्रामस्थांची मागणी
विहिरींच्या कामांबाबत समोर आलेल्या या तफावतीमुळे संबंधित यंत्रणेच्या कार्यपद्धतीवर प्रश्न उपस्थित होत आहेत. जलजीवन मिशनसारख्या महत्त्वाच्या योजनेतून पाणीटंचाई दूर होण्याची अपेक्षा असताना, प्रत्यक्षात विहिरींची कामे झाली आहेत की नाहीत, याबाबतच संभ्रम निर्माण झाल्याने ग्रामस्थांमध्ये नाराजी आहे. या संपूर्ण प्रकरणाची सखोल चौकशी करून वस्तुस्थिती स्पष्ट करावी, अशी मागणी ग्रामस्थांकडून करण्यात येत आहे.
एकीकडे पिण्याच्या पाण्यासाठी ग्रामस्थांना वणवण करावी लागत असताना, दुसरीकडे कागदोपत्री तीन विहिरी पूर्ण झाल्याची नोंद कशी करण्यात आली, असा संतप्त सवाल उपस्थित केला जात आहे. प्रत्यक्षात अस्तित्वात नसल्याचा दावा करण्यात येत असलेल्या विहिरीच्या नावावर निधी खर्च झाला असल्यास, त्या खर्चाचीही चौकशी करण्याची मागणी होत आहे. आता या प्रकरणाची जिल्हास्तरीय वरिष्ठ अधिकारी दखल घेतात का आणि संबंधित कामांच्या नोंदींची प्रत्यक्ष पडताळणी केली जाते का, याकडे फुणगूस खाडीभागातील ग्रामस्थांचे लक्ष लागले आहे.
