(ठाणे / निलेश कोकमकर)
कोकणातील कुणबी समाजाची सामाजिक, शैक्षणिक, आर्थिक आणि राजकीय प्रगती साधण्यासाठी समाजातील नेतृत्वाने एकत्र येत संघटितपणे कार्य करण्याच्या दृष्टीने महत्त्वपूर्ण पाऊल उचलले आहे. याच उद्देशाने ठाणे येथे कुणबी समाजाच्या नेतृत्वाची पहिली बैठक उत्साहपूर्ण वातावरणात पार पडली. या बैठकीत समाजाच्या एकजुटीचे महत्त्व अधोरेखित करण्यात आले, तसेच भविष्यातील वाटचालीसाठी परस्पर संवाद आणि समन्वयाच्या आवश्यकतेवर चर्चा करण्यात आली.
कोकणात कुणबी समाजाची मोठी लोकसंख्या असूनही समाजाच्या सर्वांगीण विकासासाठी व्यापक संघटन, प्रभावी संवाद आणि एकत्रित नेतृत्वाची आवश्यकता सातत्याने व्यक्त केली जात आहे. या पार्श्वभूमीवर आयोजित करण्यात आलेल्या बैठकीला विशेष महत्त्व प्राप्त झाले. समाजातील विविध क्षेत्रांत कार्यरत असलेल्या नेतृत्वाला एका व्यासपीठावर आणणे, परस्परांमध्ये समन्वय वाढवणे आणि समाजाच्या सामूहिक हितासाठी एकत्रितपणे काम करण्याची दिशा निश्चित करणे, हा या उपक्रमाचा प्रमुख उद्देश होता.
कुणबी समाजातील विविध घटकांनी एकत्र येऊन विकासाची सामूहिक दिशा स्वीकारल्यास सामाजिक प्रश्न प्रभावीपणे मांडता येतील आणि आगामी पिढीसाठी प्रगतीच्या नव्या संधी निर्माण होऊ शकतील, अशी अपेक्षा या उपक्रमाच्या माध्यमातून व्यक्त होत आहे. समाजाची सामाजिक आणि सांस्कृतिक ओळख जपत नव्या पिढीला विकासाच्या संधी उपलब्ध करून देणे, विविध घटकांना संघटित करणे आणि परस्पर सहकार्याची भावना अधिक दृढ करणे, यासाठी एकत्रित प्रयत्नांची गरजही अधोरेखित झाली.
या बैठकीला कुणबी समाजोन्नती संघ, मुंबईचे संघाध्यक्ष अनिल नवगणे आणि जिजाऊ सामाजिक व शैक्षणिक संस्थेचे अध्यक्ष निलेश सांबरे यांच्यासह कोकणातील कुणबी समाजाचे विविध क्षेत्रांत कार्यरत असलेले मान्यवर उपस्थित होते. यामध्ये संघाचे सरचिटणीस कृष्णा वणे, उपाध्यक्ष उदय कठे व शंकरराव म्हसकर, सहचिटणीस रवींद्र कुरतडकर, संजय उमासरे व प्रमोद खेराडे, खजिनदार महेश शिर्के, ज्येष्ठ संघ कार्यकारिणी सदस्य चंद्रकांत बावकर, रमेश कानावले, सुरेश कानाल, चंद्रकांत कोकमकर, अनिल भोवड, मिलिंद महाडिक व विजय नायनाक यांचा समावेश होता.
तसेच जिजाऊ संस्थेचे रत्नागिरी जिल्हाध्यक्ष ॲड. महेंद्र मांडवकर, कुणबी सेवा संघ महाराष्ट्राचे माजी अध्यक्ष रवींद्र मटकर, मंगेश हुमणे, ॲड. सुभाष बाणे, कुणबी बँकेचे संचालक संतोष चौगुले व नरेश घरटकर हेही उपस्थित होते. कुणबी युवा मुंबईच्या वतीने सरचिटणीस सचिन रामाणे, उपाध्यक्ष पुनीत खांडेकर, खजिनदार पांडुरंग दोडेकर आणि प्रचारक सूर्यकांत गावणकर यांनी सहभाग घेतला.
ठाणे येथे झालेल्या या पहिल्या बैठकीमुळे कोकणातील कुणबी समाजाच्या नेतृत्वामध्ये संवाद आणि समन्वयाची नवी सुरुवात झाली आहे. या एकजुटीचे आगामी काळात व्यापक सामाजिक कार्यात रूपांतर कसे होते, याकडे समाजाचे लक्ष लागले आहे. समाजाच्या विकासासाठी एकत्रित नेतृत्व आणि परस्पर सहकार्याची भूमिका कितपत प्रभावी ठरते, हे आगामी वाटचालीत स्पष्ट होईल.
