(रत्नागिरी /प्रतिनिधी)
गणेशोत्सवाच्या उत्साहात गर्दीचा फायदा घेत चोरट्यांनी हात साफ केल्याची घटना रत्नागिरी शहरातील मारुती मंदिर सर्कल परिसरात घडली. ‘श्री रत्नागिरीचा राजा’ सार्वजनिक गणेशोत्सव मंडळाच्या मंडपातून सुमारे ४० हजार रुपये किमतीचे चांदीचे ताम्हण अज्ञात व्यक्तीने चोरून नेल्याचे समोर आले आहे. या प्रकरणी रत्नागिरी शहर पोलिस ठाण्यात अज्ञात चोरट्याविरोधात गुन्हा दाखल करण्यात आला आहे.
मिळालेल्या माहितीनुसार, ‘श्री रत्नागिरीचा राजा’ सार्वजनिक गणेशोत्सव मंडळातर्फे मारुती मंदिर सर्कल येथे यंदाही गणेशमूर्तीची स्थापना करण्यात आली आहे. मंडळातर्फे बुधवारी, २३ सप्टेंबर रोजी सकाळी सत्यनारायण पूजेचे आयोजन करण्यात आले होते. त्यासाठी गणपती स्थापनेसमोरील भागात पूजेचे साहित्य ठेवण्यात आले होते. सकाळी सुमारे १०.३० ते १०.४५ या अवघ्या पंधरा मिनिटांच्या कालावधीत गर्दीचा फायदा घेत अज्ञात चोरट्याने पूजेसाठी ठेवलेले चांदीचे ताम्हण लंपास केले. पूजा सुरू असताना साहित्य गायब झाल्याचे लक्षात आल्यानंतर मंडळाच्या पदाधिकाऱ्यांनी शोधाशोध केली. मात्र, ताम्हणाचा ठावठिकाणा लागला नाही.
चोरीस गेलेल्या ताम्हणाचे वजन सुमारे ४०० ग्रॅम असून त्याची किंमत अंदाजे ४० हजार रुपये असल्याचे तक्रारीत नमूद करण्यात आले आहे. याप्रकरणी अमरेश सुरेश पावसकर (वय ४४, व्यवसाय—व्यापार, रा. शंखेश्वर मधुबन, बोर्डींग रोड, माळनाका, रत्नागिरी) यांनी रत्नागिरी शहर पोलिस ठाण्यात फिर्याद दिली. या तक्रारीवरून अज्ञात व्यक्तीविरोधात भारतीय न्याय संहिता, २०२३ मधील कलम ३०३(२) अन्वये गुन्हा दाखल करण्यात आला आहे. गणेशोत्सव मंडप परिसरातील गर्दी, ये-जा करणाऱ्या व्यक्ती आणि उपलब्ध सीसीटीव्ही फुटेजच्या आधारे पोलिसांकडून तपास करण्यात येत आहे.
गणेशोत्सवाच्या काळात शहरातील विविध मंडपांमध्ये भाविकांची मोठी गर्दी होत असताना या चोरीच्या घटनेने मंडळांच्या सुरक्षेचा प्रश्न पुन्हा ऐरणीवर आला आहे. पूजेचे साहित्य तसेच मौल्यवान वस्तू ठेवताना मंडळांनी अधिक दक्षता बाळगण्याची गरज या घटनेतून आता अधोरेखित झाली आहे.
