(दापोली / वार्ताहर)
तालुक्यातील हर्णे वाकडीबेंड येथे समुद्रकिनाऱ्याजवळ अनोळखी व्यक्तीचा मृतदेह आढळून आल्याने परिसरात खळबळ उडाली. आज (मंगळवारी, २५ ऑगस्ट) सकाळच्या सुमारास किनाऱ्यालगत राहणाऱ्या ग्रामस्थांच्या निदर्शनास हा प्रकार आला.
समुद्रकिनाऱ्याजवळ मृतदेह पडल्याचे आढळताच ग्रामस्थांनी तातडीने पोलिसांना याबाबत माहिती दिली. माहिती मिळताच पोलिसांनी घटनास्थळी धाव घेतली असून मृतदेह ताब्यात घेण्याची प्रक्रिया सुरू केली आहे. तसेच मृत व्यक्तीची ओळख पटविण्यासाठी पोलिसांकडून आवश्यक कार्यवाही करण्यात येत आहे. मृत व्यक्ती कोण आहे, त्याचा मृत्यू नेमका कोणत्या कारणामुळे झाला आणि मृतदेह समुद्राच्या पाण्यातून वाहत किनाऱ्यावर आला आहे का, याबाबत अद्याप कोणतीही अधिकृत माहिती समोर आलेली नाही.
पोलिसांकडून घटनास्थळाचा पंचनामा करून मृतदेहाची पुढील वैद्यकीय प्रक्रिया तसेच ओळख पटविण्याचे काम सुरू आहे. मृत व्यक्तीच्या अंगावरील वस्तू आणि इतर उपलब्ध बाबींच्या आधारे ओळख पटविण्याचा प्रयत्न केला जात आहे. दरम्यान, समुद्रकिनारी अनोळखी मृतदेह सापडल्याने या घटनेमागे नेमके काय रहस्य आहे, याबाबत परिसरात चर्चेला उधाण आले आहे. मृत्यूचे नेमके कारण आणि मृतदेह किनाऱ्यावर कसा पोहोचला, हे पोलिसांच्या तपासानंतरच स्पष्ट होणार आहे.
