(रत्नागिरी /प्रतिनिधी)
गुहागर तालुक्यातील शृंगारतळी येथील मारहाण प्रकरणानंतर सोशल मीडियावर प्रसारित झालेल्या कथित ऑडिओ क्लिपमुळे चर्चेत आलेले गुहागर पोलीस ठाण्याचे पोलीस निरीक्षक सचिन सावंत यांची अखेर मुंबई शहर येथे बदली करण्यात आली आहे. महाराष्ट्र पोलीस आस्थापना मंडळाच्या मान्यतेने हा बदली आदेश जारी करण्यात आला असून, संबंधित अधिकाऱ्यांना तातडीने कार्यमुक्त करण्याच्या सूचनाही देण्यात आल्या आहेत.
गुहागर तालुक्यातील शृंगारतळी येथे १ ऑगस्ट रोजी रात्री दोन तरुणांच्या गटांमध्ये किरकोळ कारणावरून वाद झाला. त्यानंतर या वादाचे रूपांतर मारहाणीत झाले. या घटनेचा व्हिडीओ समाजमाध्यमांवर मोठ्या प्रमाणात प्रसारित झाल्यानंतर परिसरात संतापाची प्रतिक्रिया उमटली. पीडित तरुणांच्या कुटुंबीयांसह विविध सामाजिक संघटनांनी संबंधितांवर कठोर कारवाई करण्याची मागणी केली होती. त्यानंतर गुहागर पोलिसांनी संबंधित आरोपींविरुद्ध गुन्हा दाखल करून तपास सुरू केला. मारहाण प्रकरणाची चर्चा सुरू असतानाच पोलीस निरीक्षक सचिन सावंत यांच्या नावाने कथित ऑडिओ क्लिप समाजमाध्यमांवर प्रसारित झाली. या क्लिपमध्ये मारहाण करणाऱ्या तरुणांच्या कृत्याचे समर्थन करण्यात आल्याचा आरोप करण्यात आला. त्यामुळे नागरिक, सामाजिक संघटना तसेच विविध स्तरांतून नाराजी व्यक्त करण्यात आली.
मात्र, समाजमाध्यमांवर प्रसारित झालेल्या या ऑडिओ क्लिपची सत्यता अधिकृतरीत्या सिद्ध झालेली नसल्याचेही महत्त्वाचे आहे. त्यामुळे क्लिपमधील संभाषण आणि त्याची पार्श्वभूमी याबाबत अधिकृत निष्कर्ष समोर आलेला नाही. तथापि, या प्रकरणामुळे गुहागर पोलीस प्रशासनाच्या कार्यपद्धतीवर प्रश्न उपस्थित झाले होते. या सर्व घडामोडींच्या पार्श्वभूमीवर महाराष्ट्र पोलीस कायद्यातील तरतुदींनुसार महाराष्ट्र पोलीस आस्थापना मंडळाने सचिन सावंत यांच्या बदलीचा निर्णय घेतला. त्यांची मुंबई शहर येथे बदली करण्यात आली असून, संबंधित घटकप्रमुखांनी त्यांना तातडीने कार्यमुक्त करावे, असे आदेशात नमूद करण्यात आले आहे. नवीन पदस्थापनेच्या ठिकाणी विहित मुदतीत हजर राहण्याचे निर्देशही देण्यात आले आहेत. आदेशाचे पालन न केल्यास संबंधित अधिकाऱ्याविरुद्ध शिस्तभंगाची कारवाई करण्यात येईल, असे आदेशात स्पष्ट करण्यात आले आहे.
पुढील घडामोडींकडे लक्ष
शृंगारतळी येथील मारहाण, त्यानंतर समाजमाध्यमांवर प्रसारित झालेला व्हिडीओ, चर्चेत आलेली कथित ऑडिओ क्लिप आणि त्यानंतर झालेली पोलीस निरीक्षकांची बदली, या सलग घडामोडींमुळे गुहागर तालुक्यातील वातावरण गेल्या काही दिवसांत चांगलेच तापले होते. आता पोलीस निरीक्षक सचिन सावंत यांच्या बदलीनंतर या प्रकरणातील तपासाची दिशा काय राहणार, तसेच कथित ऑडिओ क्लिपसंदर्भात पुढील काळात कोणती प्रशासकीय किंवा चौकशीची कार्यवाही होते, याकडे नागरिकांचे लक्ष लागले आहे.
एसपी नितीन बगाटे यांची शिस्त पुन्हा चर्चेत
गुन्हेगारीविरोधातील कठोर भूमिका, कामातील शिस्त आणि प्रशासकीय निर्णयांची अंमलबजावणी यामुळे पोलीस अधीक्षक नितीन बगाटे यांची कार्यपद्धती पुन्हा एकदा चर्चेत आली आहे. गुहागर येथील पोलीस निरीक्षक सचिन सावंत यांच्या मुंबई शहर येथे झालेल्या बदलीच्या पार्श्वभूमीवर प्रशासकीय कारवाई ही ‘पोलीस दलात शिस्त सर्वोच्च’ हा संदेश देणारी असल्याची चर्चा आता सुरू झाली आहे. एसपी नितीन बगाटे यांच्या कार्यकाळात कायदा-सुव्यवस्था, नागरिकांचा विश्वास आणि पोलिस दलातील शिस्त यावर सातत्याने भर दिला जात असल्याचे चित्र दिसून येत आहे.
