(रत्नागिरी / प्रतिनिधी)
गुन्हे तपास प्रक्रियेला अधिक अचूक, परिणामकारक आणि तंत्रज्ञानाधिष्ठित बनविण्याच्या दिशेने रत्नागिरी पोलीस दलाने महत्त्वपूर्ण पाऊल उचलले आहे. कृत्रिम बुद्धिमत्ता (Artificial Intelligence – AI) तंत्रज्ञानावर आधारित ‘अधिनिर्णय’ या नाविन्यपूर्ण ॲपचे उद्घाटन २९ जुलै रोजी पोलीस अधीक्षक कार्यालयात कोकण परिक्षेत्राचे विशेष पोलीस महानिरीक्षक चंद्र किशोर मीना यांच्या हस्ते झाले. जिल्हा पोलीस अधीक्षक नितीन दत्तात्रय बगाटे यांच्या संकल्पनेतून साकारलेल्या या ॲपमुळे गुन्हे तपासाच्या गुणवत्तेला नवे बळ मिळणार असल्याचे मानले जात आहे.
पोलीस अधिकारी आणि अंमलदारांसाठी विकसित करण्यात आलेले ‘अधिनिर्णय’ हे एआय-आधारित ॲप तपास प्रक्रियेत डिजिटल सहाय्यक म्हणून कार्य करणार आहे. तपासादरम्यान राहिलेल्या त्रुटी, अपूर्ण बाबी, आवश्यक कायदेशीर तरतुदी आणि प्रक्रियात्मक बाबींकडे अधिकाऱ्यांचे लक्ष वेधून तपास अधिक शिस्तबद्ध, अचूक आणि सर्वसमावेशक करण्यास हे ॲप मदत करणार आहे. त्यामुळे तपासाची गुणवत्ता उंचावण्याबरोबरच प्रकरणांच्या प्रभावी आणि वेळेवर निकाली काढण्यासही या तंत्रज्ञानाचा उपयोग होणार आहे. आधुनिक तंत्रज्ञानाचा प्रभावी वापर करून पोलीस यंत्रणा अधिक सक्षम करण्याच्या उद्देशाने विकसित करण्यात आलेले ‘अधिनिर्णय’ हे ॲप रत्नागिरी पोलीस दलाच्या तंत्रज्ञानाभिमुख आणि नाविन्यपूर्ण पोलीसिंगच्या वाटचालीतील महत्त्वाचा टप्पा मानला जात आहे. कृत्रिम बुद्धिमत्तेच्या साहाय्याने तपास प्रक्रियेत अचूकता, पारदर्शकता आणि कार्यक्षमता वाढविण्याची क्षमता या ॲपमध्ये असल्याने भविष्यातील तपास पद्धतीसाठी ते मार्गदर्शक ठरणार आहे.
उद्घाटनप्रसंगी विशेष पोलीस महानिरीक्षक चंद्र किशोर मीना यांनी रत्नागिरी पोलीस दलाच्या या अभिनव उपक्रमाचे विशेष कौतुक केले. तपास प्रक्रियेत कृत्रिम बुद्धिमत्तेचा प्रभावी वापर करून गुणवत्तावृद्धी आणि कार्यक्षमतेत वाढ करण्याच्या या प्रयत्नांचे त्यांनी स्वागत करत, भविष्यात पोलीस दलाने तंत्रज्ञानाचा अधिक व्यापक वापर करावा, अशी अपेक्षा व्यक्त केली. राज्याच्या पोलीस व्यवस्थेत आधुनिक तंत्रज्ञानाचा स्वीकार वेगाने होत असताना रत्नागिरी पोलीस दलाने विकसित केलेले ‘अधिनिर्णय’ हे ॲप केवळ स्थानिक पातळीपुरते मर्यादित न राहता, भविष्यात इतर पोलीस यंत्रणांसाठीही आदर्श ठरण्याची क्षमता बाळगून असल्याची भावना यावेळी व्यक्त करण्यात आली.
