(दापोली / रत्नागिरी)
दापोली तालुक्यात अल्पवयीन मुलींवरील अत्याचाराच्या घटनांमध्ये चिंताजनक वाढ होत असल्याचे पुन्हा एकदा समोर आले आहे. १० जुलै रोजी दापोली पोलीस ठाण्यात संरक्षण ऑफ चिल्ड्रेन फ्रॉम सेक्सुअल ऑफेन्सेस (POCSO) कायद्यांतर्गत आणखी एका गंभीर गुन्ह्याची नोंद करण्यात आली आहे. विशेष म्हणजे, या प्रकरणात पीडित अल्पवयीन मुलगी गर्भवती असल्याची बाब समोर आल्याने संपूर्ण तालुक्यात संताप आणि चिंता व्यक्त केली जात आहे.
पोलीस सूत्रांकडून मिळालेल्या माहितीनुसार, संबंधित गुन्हा १० जुलै रोजी रात्री ११ वाजून ३९ मिनिटांनी दापोली पोलीस ठाण्यात दाखल करण्यात आला. या घटनेमुळे जुलै महिन्यात दापोली तालुक्यात नोंद झालेल्या POCSO गुन्ह्यांची संख्या चारवर पोहोचली आहे. धक्कादायक बाब म्हणजे, जुलैच्या पहिल्याच आठवड्यात अवघ्या चार दिवसांच्या कालावधीत तीन POCSO गुन्हे नोंदविण्यात आले होते. त्यानंतर लगेचच चौथे प्रकरण समोर आल्याने कायदा आणि सुव्यवस्थेबाबत गंभीर प्रश्न उपस्थित केले जात आहेत. वारंवार घडणाऱ्या अशा घटनांमुळे पालकांमध्ये भीतीचे वातावरण निर्माण झाले असून मुलींच्या सुरक्षिततेबाबत चिंता व्यक्त केली जात आहे.
दरम्यान, या प्रकारांवर कठोर कारवाई व्हावी आणि आरोपींना तातडीने कठोर शिक्षा व्हावी, या मागणीसाठी दापोलीतील निवेदिता प्रतिष्ठानच्या माध्यमातून दापोलीतील नागरिकांनी १० जुलै रोजी तहसीलदारांना निवेदन सादर केले होते. अल्पवयीन मुलींवरील अत्याचाराच्या वाढत्या घटनांवर प्रभावी नियंत्रण आणण्यासाठी प्रशासनाने कठोर पावले उचलावीत, अशी मागणी या निवेदनातून करण्यात आली आहे.
सामाजिक कार्यकर्त्यांचे मत आहे की, POCSO कायद्यांतर्गत गुन्ह्यांमध्ये जलद तपास, जलद न्यायालयीन प्रक्रिया आणि कठोर शिक्षा झाल्यासच अशा घटनांवर आळा बसू शकतो. तसेच शाळा, महाविद्यालये, पालक आणि सामाजिक संस्थांनीही मुलांच्या संरक्षणासाठी अधिक जागरूक होण्याची गरज असल्याचे मत व्यक्त होत आहे.
दापोलीसारख्या शांत आणि शैक्षणिक वातावरणासाठी ओळखल्या जाणाऱ्या तालुक्यात अल्पवयीन मुलींवरील अत्याचाराच्या घटनांची वाढ ही अत्यंत गंभीर बाब मानली जात आहे. या घटना केवळ दापोलीपुरत्याच मर्यादित नसून रत्नागिरी जिल्हा आणि राज्यासाठीही धोक्याची घंटा असल्याची प्रतिक्रिया नागरिकांकडून व्यक्त होत आहे.
