(रत्नागिरी/ प्रतिनिधी)
रत्नागिरी नगर परिषदेतील विकासकामांचे श्रेय कोणत्याही एका पक्षाने घेण्याऐवजी महायुतीच्या घटक पक्षांनी एकत्रितपणे आणि समन्वयाने काम करणे आवश्यक असल्याचे प्रतिपादन राज्याचे उद्योगमंत्री तथा जिल्ह्याचे पालकमंत्री उदय सामंत यांनी केले. स्थानिक पातळीवरील पदाधिकाऱ्यांनी परस्पर संवाद आणि समन्वय राखल्यास महायुतीतील घटक पक्षांमध्ये गैरसमज अथवा मतभेद निर्माण होणार नाहीत, असेही त्यांनी स्पष्ट केले.
नगर परिषदेतील विकासनिधी आणि त्याच्या श्रेयावरून सुरू असलेल्या चर्चांच्या पार्श्वभूमीवर सामंत यांनी आपली भूमिका मांडली. त्यांनी सांगितले की, काही विकासकामांच्या प्रस्तावांना अद्याप प्रशासकीय, स्थायी समिती तसेच सर्वसाधारण सभेची मंजुरी मिळणे बाकी आहे. त्यामुळे शिवसेना शहरप्रमुख बिपीन बंदरकर यांनी मांडलेली भूमिका योग्य असल्याचे नमूद करत, केवळ भाजपानेच निधी उपलब्ध करून दिल्याचा दावा वस्तुस्थितीला धरून नसल्याचे त्यांनी सूचित केले. नगर परिषदेत बहुमत असूनही महायुती धर्म जपत भाजपच्या नगरसेवकांनाही समान न्यायाने निधी उपलब्ध करून देण्यात आल्याचे सामंत यांनी सांगितले. निधी वाटपात कोणत्याही प्रकारचा पक्षपात करण्यात आलेला नसून सर्व घटक पक्षांना समान वागणूक देण्यात आल्याचा दावा त्यांनी केला.
महायुतीतील समन्वयाचे महत्त्व अधोरेखित करताना सामंत म्हणाले की, राम आळीतील गटाराच्या कामाबाबत स्थानिक पातळीवर समन्वयाचा अभाव दिसून आला. त्या कामासाठी निधी मंजूर केला असला तरी अशा विकासकामांमध्ये परस्पर संवाद आणि समन्वय राखणे गरजेचे आहे. महायुती टिकवण्यासाठी सर्व घटक पक्षांनी एकमेकांची भूमिका समजून घेत सहकार्याची भूमिका स्वीकारली पाहिजे, असे त्यांनी नमूद केले. मुख्यमंत्री एकनाथ शिंदे यांनी भाजप प्रदेशाध्यक्ष रवींद्र चव्हाण यांच्या सूचनांना नेहमीच सकारात्मक प्रतिसाद दिल्याचा उल्लेख करत, जिल्हा परिषद आणि पंचायत समितीमध्ये भाजपला प्रत्येकी एक स्वीकृत सदस्य देण्याचा शब्दही पाळला जाणार असल्याचे त्यांनी स्पष्ट केले.
विकासासाठी निधी उपलब्ध; अन्यायाचा प्रश्नच नाही
देवरुख नगरपंचायतीसाठी बंधाऱ्याच्या कामाकरिता आठ कोटी रुपये तसेच इमारतीसाठी चार कोटी रुपयांचा निधी उपलब्ध करून देण्यात आल्याचे सांगत, विकासकामांच्या बाबतीत कोणावरही अन्याय झालेला नसल्याचा दावा सामंत यांनी केला.
‘रत्नागिरीच्या सर्वांगीण विकासासाठी महायुती कटिबद्ध’
रत्नागिरी जिल्ह्याच्या सर्वांगीण विकासासाठी महायुती सरकार कटिबद्ध असल्याचा पुनरुच्चार करताना सामंत यांनी विमानतळ, वैद्यकीय महाविद्यालय आणि स्मार्ट सिटीसारख्या महत्त्वाकांक्षी प्रकल्पांचा उल्लेख केला. हे प्रकल्प जिल्ह्याच्या विकासाला नवी दिशा देणारे ठरतील, असा विश्वास त्यांनी व्यक्त केला. स्थानिक पातळीवर काही मतभेद दिसत असले तरी वरिष्ठ स्तरावर महायुती मजबूत असल्याचे सांगत, प्रशासकीय प्रक्रियेतील अडथळे दूर करून प्रलंबित विकास प्रस्तावांना गती दिली जाईल, अशी ग्वाही त्यांनी दिली. विकासकामांच्या श्रेयापेक्षा जनतेच्या हिताला प्राधान्य देणे हीच महायुतीची भूमिका असल्याचेही त्यांनी अधोरेखित केले.
