( बर्मिंगहॅम )
बर्मिंगहॅममधील एजबॅस्टन मैदानावर झालेल्या आयसीसी महिला टी-20 विश्वचषक 2026 च्या गट ‘अ’ सामन्यात भारताने कट्टर प्रतिस्पर्धी पाकिस्तानवर 64 धावांनी एकतर्फी विजय मिळवत स्पर्धेची दमदार सुरुवात केली.
प्रथम फलंदाजी करताना भारताची सुरुवात काहीशी अडखळती झाली. अवघ्या 18 धावांवर दोन विकेट्स गमावल्यानंतर स्मृती मंधाना आणि कर्णधार हरमनप्रीत कौर यांनी डाव सावरला. मंधानाने 44 चेंडूत 68 धावा करत भारताला स्थैर्य दिले. तिच्या खेळीत 9 चौकार आणि 2 षटकारांचा समावेश होता.
हरमनप्रीत कौरने संयमी खेळी करत 36 धावांचे योगदान दिले. मधल्या फळीत जेमिमा रॉड्रिग्स स्वस्तात बाद झाली, मात्र ऋचा घोषने 17 चेंडूत 34 धावांची आक्रमक खेळी करत भारताला मजबूत धावसंख्येकडे नेले. भारताने 20 षटकांत 6 गडी गमावून 170 धावा केल्या.
171 धावांच्या लक्ष्याचा पाठलाग करताना पाकिस्तानची सुरुवात चांगली झाली. मुनीबा अलीने 41 धावांची झुंजार खेळी करत संघाला आशा दाखवली. मात्र त्यानंतर भारतीय फिरकी आक्रमणाने सामन्याचा पूर्ण कल बदलला.
अनुभवी अष्टपैलू दीप्ती शर्माने भेदक गोलंदाजी करत पाकिस्तानच्या फलंदाजीचा कणा मोडला. तिने अवघ्या 10 धावांत 5 बळी घेत आपल्या टी-20 कारकिर्दीतील सर्वोत्तम कामगिरी नोंदवली. तिच्या माऱ्यासमोर पाकिस्तानचा संपूर्ण संघ 106 धावांत गारद झाला.
श्री चरणीनेही प्रभावी गोलंदाजी करत 3 बळी घेतले, तर शेफाली वर्माला एक विकेट मिळाली. पाकिस्तानचा डाव 17 षटकांतच संपुष्टात आला आणि भारताने 64 धावांनी मोठा विजय मिळवला.
या विजयामुळे भारताने गुणतालिकेत दमदार सुरुवात केली असून नेट रनरेटमध्येही मोठी सुधारणा झाली आहे. पाकिस्तानविरुद्धच्या या एकतर्फी विजयामुळे भारतीय संघाचा आत्मविश्वास उंचावला असून पुढील सामन्यांसाठी संघ अधिक मजबूत स्थितीत पोहोचला आहे.
दरम्यान, एजबॅस्टन मैदानावर भारत-पाकिस्तान सामन्यासाठी विक्रमी प्रेक्षक उपस्थिती पाहायला मिळाली, ज्यामुळे महिला क्रिकेटला जागतिक स्तरावर मिळत असलेली लोकप्रियता पुन्हा अधोरेखित झाली.
