(मुंबई)
केंद्र आणि राज्य शासनाच्या महत्त्वाकांक्षी ‘महा आवास अभियान 2023-24’ अंतर्गत कोकण विभागाने उल्लेखनीय कामगिरी करत संपूर्ण महाराष्ट्रात प्रथम क्रमांक पटकावला आहे. ‘प्रधानमंत्री आवास योजना-ग्रामीण’ (PMAY-G) च्या प्रभावी अंमलबजावणीमुळे कोकण विभागाला हा बहुमान मिळाला असून या यशामागे तत्कालीन विभागीय आयुक्त डॉ. महेंद्र कल्याणकर यांच्या नेतृत्वाची मोठी भूमिका मानली जात आहे.
ग्रामीण भागातील गरजू लाभार्थ्यांना वेळेत हक्काची घरे उपलब्ध करून देण्यासाठी केलेले सूक्ष्म नियोजन, सातत्यपूर्ण पाठपुरावा आणि प्रशासनातील प्रभावी समन्वय यामुळे कोकण विभागाने राज्यात आदर्श निर्माण केला आहे.
डॉ. महेंद्र कल्याणकर यांचा राज्यस्तरीय सन्मान
या उल्लेखनीय कामगिरीबद्दल डॉ. महेंद्र कल्याणकर यांना राज्यस्तरीय पुरस्काराने गौरविण्यात आले. सातारा येथील सैनिक स्कूलमध्ये आयोजित करण्यात आलेल्या भव्य लाभार्थी मेळावा आणि महा आवास अभियान पुरस्कार वितरण सोहळ्यात त्यांना विशेष पुरस्कार प्रदान करण्यात आला. सध्या डॉ. महेंद्र कल्याणकर हे झोपडपट्टी पुनर्वसन प्राधिकरणाचे मुख्य कार्यकारी अधिकारी (CEO) म्हणून कार्यरत आहेत. त्यांच्या नेतृत्वाखाली कोकण विभागाने ग्रामीण गृहनिर्माण क्षेत्रात नवा आदर्श निर्माण केल्याचे मत विविध स्तरांतून व्यक्त केले जात आहे.
कोकणातील ग्रामीण भागाचा कायापालट
कोकण विभागात प्रधानमंत्री आवास योजना-ग्रामीणची अंमलबजावणी वेगाने आणि पारदर्शक पद्धतीने करण्यात आली. लाभार्थ्यांना वेळेत निधी वितरण, घरकुल बांधकामाचा नियमित आढावा आणि प्रशासकीय यंत्रणेमधील समन्वय यामुळे योजना प्रभावीपणे राबवली गेली. विशेष म्हणजे ग्रामीण भागातील हजारो कुटुंबांना पक्क्या घरांचे स्वप्न पूर्ण करण्यासाठी प्रशासनाने युद्धपातळीवर काम केले. त्यामुळे अनेक गावांमध्ये घरकुल प्रकल्प वेळेत पूर्ण झाले असून ग्रामीण जीवनमानात सकारात्मक बदल होत असल्याचे दिसून येत आहे.
राज्यासाठी आदर्श ठरला कोकण विभाग
‘महा आवास अभियान’ अंतर्गत कोकण विभागाने मिळवलेले यश हे केवळ प्रशासकीय कामगिरी नसून ग्रामीण विकासाच्या दृष्टीने महत्त्वाचा टप्पा मानला जात आहे. राज्यातील इतर विभागांसाठी कोकण मॉडेल प्रेरणादायी ठरत असल्याची चर्चा आहे. ग्रामीण गृहनिर्माण क्षेत्रात प्रभावी नियोजन, नियमित मॉनिटरिंग आणि लोकाभिमुख प्रशासनाच्या बळावर कोकण विभागाने महाराष्ट्रात अव्वल स्थान मिळवले असल्याचे गौरवोद्गार यावेळी काढण्यात आले.
