(रत्नागिरी / वार्ताहर)
स्टेट बँक ऑफ इंडियाचे माजी व्यवस्थापक, तेली समाजाचे माजी जिल्हाध्यक्ष तसेच रत्नसागर कबड्डी क्रीडा मंडळाचे कॅप्टन विजय पुनसकर यांचे अल्पशा आजाराने बुधवारी, दि. ६ मे रोजी रात्री ९ वाजण्याच्या सुमारास परकार हॉस्पिटल येथे दुःखद निधन झाले. त्यांच्या निधनाने रत्नागिरीत सामाजिक, क्रीडा आणि बँकिंग क्षेत्रात हळहळ व्यक्त होत आहे.
विजय पुनसकर यांनी स्टेट बँक ऑफ इंडियामध्ये व्यवस्थापक म्हणून कार्यरत असताना प्रामाणिक व कर्तव्यदक्ष अधिकारी म्हणून आपली ओळख निर्माण केली होती. त्याचबरोबर सामाजिक क्षेत्रातही त्यांनी सक्रिय सहभाग घेत तेली समाजाच्या जिल्हाध्यक्षपदाची जबाबदारी यशस्वीपणे सांभाळली होती. समाजातील विविध उपक्रम, सामाजिक बांधिलकी आणि संघटनात्मक कार्यामुळे त्यांचा मोठा मित्रपरिवार निर्माण झाला होता.
क्रीडा क्षेत्रातही त्यांचे महत्त्वपूर्ण योगदान राहिले. रत्नसागर कबड्डी क्रीडा मंडळाचे कॅप्टन म्हणून त्यांनी अनेक स्पर्धांमध्ये उल्लेखनीय कामगिरी करत खेळाडूंना प्रेरणा दिली होती. त्यांच्या नेतृत्वगुणांमुळे आणि मनमिळावू स्वभावामुळे ते सर्व स्तरांतील लोकांमध्ये लोकप्रिय होते.
त्यांच्या निधनाची वार्ता समजताच विविध क्षेत्रांतील मान्यवर, मित्रपरिवार आणि नातेवाईकांनी शोक व्यक्त केला आहे. त्यांच्या पश्चात कुटुंबीय, नातेवाईक आणि मोठा मित्रपरिवार असा परिवार आहे. त्यांची अंतिमयात्रा आज (गुरुवार, दि. ७ मे रोजी) सकाळी ९.३० वाजता साईनगर, कुवारबाव येथील निवासस्थानातून निघणार आहे.
