(नाशिक/ मुंबई)
भोंदूगिरीच्या आरोपांमुळे आधीच चर्चेत असलेला अशोक खरात याच्याविरोधात आता आणखी धक्कादायक माहिती समोर येत असून, विशेष तपास पथकाच्या (SIT) चौकशीत कथित ‘बदली रॅकेट’चा संशय व्यक्त करण्यात आला आहे. तपासादरम्यान समोर आलेल्या माहितीनुसार, शासकीय अधिकाऱ्यांच्या पोस्टिंग आणि बदल्यांमध्ये हस्तक्षेप करून मोठ्या प्रमाणात आर्थिक व्यवहार झाले असल्याचे समोर आले आहे. नाशिकमधील एका वरिष्ठ महिला अधिकाऱ्याने इच्छित पद मिळवण्यासाठी वारंवार खरातच्या संपर्कात राहिल्याचा दावा सूत्रांनी केला असून, तिला अपेक्षित ‘ड्रीम पोस्टिंग’ मिळाल्यानंतर आर्थिक देवाणघेवाण झाल्याचा संशय तपास यंत्रणांकडून व्यक्त केला जात आहे. या प्रक्रियेत धार्मिक विधी, पूजा यांचा आधार घेऊन विश्वास संपादन करण्याची पद्धत वापरली गेल्याचेही प्राथमिक तपासात समोर आले आहे.
या प्रकरणाचा विस्तार एकट्या अधिकाऱ्यापुरता मर्यादित नसून महसूल आणि पोलीस विभागातील काही अधिकाऱ्यांनाही कथितरित्या लाभ मिळाल्याची शक्यता तपासली जात आहे. या सर्व व्यवहारांमध्ये कोट्यवधी रुपयांची उलाढाल झाली असावी, तसेच काही राजकीय व्यक्तींशीही संबंध असल्याच्या चर्चांना उधाण आले आहे. तपास यंत्रणा या सर्व बाबींचा सखोल छडा लावत असून, संबंधित पुरावे गोळा करण्याचे काम सुरू आहे. दरम्यान, अशोक खरात याच्याकडे दैवी शक्ती असल्याचा समज निर्माण करून तो अधिकाऱ्यांवर आणि सर्वसामान्यांवर प्रभाव टाकत असल्याचेही तपासात नमूद करण्यात आले आहे. या विश्वासाचा फायदा घेत पोस्टिंग, प्रमोशन, तसेच शासकीय चौकशा थांबवण्याचे आश्वासन देण्यात येत असल्याचे आरोप आहेत.
याशिवाय, कथितरित्या शासकीय योजना मंजूर करून देणे, वादग्रस्त जमिनींचे व्यवहार साधणे, उद्योगपतींची अडलेली कामे मार्गी लावणे अशा विविध माध्यमांतून प्रभाव निर्माण केल्याचेही समोर येत आहे. काही अधिकाऱ्यांनी खरातला संरक्षण दिल्याचा आरोप स्थानिकांकडून करण्यात येत असून, त्यामुळे त्याचा प्रभाव अधिक वाढल्याची चर्चा आहे. या संपूर्ण प्रकरणामुळे प्रशासनातील पारदर्शकतेवर प्रश्नचिन्ह उपस्थित झाले असून, तपास पुढे सरकत असताना आणखी धक्कादायक खुलासे होण्याची शक्यता व्यक्त केली जात आहे. सध्या या प्रकरणाकडे संपूर्ण राज्याचे लक्ष लागले असून, आगामी काळात या तपासातून आणखी कोणती नावे आणि तपशील समोर येतात, हे पाहणे महत्त्वाचे ठरणार आहे.
