(मुंबई)
अजित पवार यांच्या निधनानंतर राष्ट्रवादी काँग्रेसच्या नेतृत्वाबाबत सुरू असलेल्या चर्चांना अखेर पूर्णविराम मिळाला आहे. सुनेत्रा पवार या राष्ट्रवादी काँग्रेसच्या नव्या राष्ट्रीय अध्यक्षा म्हणून लवकरच पदभार स्वीकारणार असल्याची अधिकृत घोषणा पक्षाचे कार्याध्यक्ष प्रफुल्ल पटेल यांनी शुक्रवारी केली. येत्या पंधरा दिवसांत त्यांच्या निवडीची सर्व औपचारिक प्रक्रिया पूर्ण केली जाईल, असेही त्यांनी स्पष्ट केले.
अजित पवारांच्या आकस्मिक निधनामुळे पक्षात निर्माण झालेली नेतृत्वाची पोकळी भरून काढण्यासाठी आणि संघटनात्मक बांधणी अधिक मजबूत करण्यासाठी सुनेत्रा पवार यांच्या नावावर पक्षाने एकमताने शिक्कामोर्तब केल्याचे पटेल यांनी सांगितले. या पदासाठी त्या एकमेव उमेदवार असून, पक्षाच्या सर्व स्तरांतून त्यांना व्यापक पाठिंबा मिळत आहे. सुनेत्रा पवार यांच्या नेतृत्वाखाली पक्षाला नव्याने उभारी देणे आणि संघटन अधिक सक्षम करणे हेच आमचे सर्वोच्च प्राधान्य असल्याचे पटेल यांनी पत्रकारांशी बोलताना स्पष्ट केले.
दरम्यान, नुकत्याच पार पडलेल्या स्थानिक स्वराज्य संस्थांच्या निवडणुकांमध्ये राष्ट्रवादी काँग्रेसने दमदार कामगिरी केल्याचा उल्लेखही त्यांनी केला. पुणे जिल्हा परिषदेत मिळवलेल्या दणदणीत विजयासह कोल्हापूर आणि अन्य जिल्हा परिषदांमध्येही पक्षाने आपले राजकीय वर्चस्व सिद्ध केल्याचे पटेल म्हणाले. या यशाच्या पार्श्वभूमीवर आगामी काळात गावपातळीवरील कार्यकर्त्यांना अधिक बळ देऊन पक्षाचा पाया मजबूत करण्यावर भर दिला जाणार असल्याचेही त्यांनी नमूद केले.
दुसरीकडे, शरद पवार यांच्या नेतृत्वाखालील राष्ट्रवादी काँग्रेस (एसपी) आणि राष्ट्रवादी काँग्रेस यांच्या संभाव्य विलीनीकरणाच्या चर्चांवर प्रफुल्ल पटेल यांनी भाष्य करण्याचे टाळले. जरी सुप्रिया सुळे यांनी दिल्लीत अशा चर्चांचा उल्लेख केला असला, तरी सध्या पक्षाचे संपूर्ण लक्ष केवळ अंतर्गत संघटन मजबूत करण्यावर असल्याचे पटेल यांनी स्पष्ट केले.
सुनेत्रा पवार यांच्या नेतृत्वाखाली राष्ट्रवादी काँग्रेसचा पुढील राजकीय प्रवास कसा आकार घेतो, याकडे आता राज्यातील राजकीय वर्तुळाचे लक्ष लागले आहे.
