(मुंबई)
भारताच्या महिला क्रिकेट संघाने ICC Women’s Cricket World Cup 2025 मध्ये ऐतिहासिक कामगिरी करत देशाला पहिल्यांदाच विश्वचषक जिंकून दिला. या अभूतपूर्व यशात महाराष्ट्रातील तीन खेळाडूंनी – उपकर्णधार स्मृती मंधाना, जेमिमा रॉड्रिग्ज आणि राधा यादव – यांनी मोलाची भूमिका बजावली. या तिन्ही खेळाडूंचा शुक्रवारी मुख्यमंत्री देवेंद्र फडणवीस यांच्या हस्ते वर्षा शासकीय निवासस्थानी भव्य सत्कार करण्यात आला.
राज्य सरकारतर्फे प्रत्येक खेळाडूला २.२५ कोटी रुपयांचा धनादेश देऊन गौरवण्यात आले, तर मुख्य प्रशिक्षक अमोल मुजुमदार यांना २२.५० लाख रुपये प्रदान करण्यात आले. या सोहळ्याला उपमुख्यमंत्री अजित पवार, क्रीडा मंत्री माणिकराव कोकाटे, सांस्कृतिक कार्यमंत्री आशिष शेलार, प्रधान सचिव संजय खंडारे, आणि आयुक्त शीतल तेली यांच्यासह अनेक मान्यवर उपस्थित होते.
खेळाडूंना शाल, पुष्पगुच्छ आणि धनादेश देऊन सन्मानित करण्यात आले. याशिवाय गोलंदाजी प्रशिक्षक आविष्कार साळवी, पद्मश्री डायना एडलजी, ॲनालिस्ट अनिरुद्ध देशपांडे, तसेच लॉजिस्टिक सपोर्ट टीममधील अपर्णा गंभीरराव, मिहिर उपाध्याय, पूर्वा काटे आणि ममता शिररुल्ला यांचाही विशेष सत्कार झाला. मुख्यमंत्री फडणवीस यांनी सर्व सपोर्ट स्टाफसाठी प्रत्येकी ११ लाख रुपयांच्या पारितोषिकाची घोषणा केली आणि त्यांच्या योगदानाचे कौतुक केले.
महिला क्रिकेटपटूंचा सार्थ अभिमान – मुख्यमंत्री फडणवीस
मुख्यमंत्री फडणवीस म्हणाले, महिला क्रिकेट वर्ल्ड कप नेहमी ठराविक देशांकडेच राहायचा, परंतु पहिल्यांदाच हा मानाचा कप भारताकडे आला आहे, याचा आम्हाला अतुलनीय अभिमान वाटतो. या मुलींनी दाखवलेली जिद्द, संघभावना आणि एकोपाच या यशाचे खरे गमक आहे. हा विजय केवळ खेळाडूंचाच नाही, तर संपूर्ण टीम आणि महाराष्ट्राचा आहे. राज्यात निर्माण झालेली आनंदाची लाट या मुलींनीच आणली आहे.
त्यांनी पुढे सांगितले की, “या खेळाडू भविष्यात अनेक तरुणींना प्रेरणा देतील आणि महिला खेळाडू विविध क्रीडा प्रकारांमध्ये पुढे येतील, असा मला विश्वास आहे.”
कुटुंबीयांच्या भावना आणि खेळाडूंचे अभिप्राय
जेमिमा रॉड्रिग्जच्या पालकांनीही या सोहळ्यात उपस्थिती लावली. जेमिमाने उपांत्य फेरीत ऑस्ट्रेलियाविरुद्ध केलेल्या नाबाद १२७ धावांच्या खेळीचा उल्लेख करताना तिच्या वडिलांचे डोळे पाणावले. “ती खेळी आमच्यासाठी स्वप्नवत होती,” असं ते म्हणाले. उपकर्णधार स्मृती मंधाना म्हणाली, “हा विश्वचषक महाराष्ट्राच्या भूमीवर जिंकणे आमच्यासाठी विशेष अभिमानास्पद आहे. राज्याच्या लोकांच्या प्रेमामुळेच आम्ही हे यश मिळवू शकलो.”
स्मृती मंधानाची चमकदार कामगिरी
स्मृती मंधाना ही स्पर्धेतील दुसऱ्या क्रमांकाची सर्वाधिक धावांची फलंदाज ठरली. ८ डावांत तिने ४३४ धावा केल्या, सरासरी ५४.२५, एक शतक आणि चार अर्धशतके अशी तिची कामगिरी होती. उपांत्य फेरीत ऑस्ट्रेलियाविरुद्ध ३५६ धावांच्या आव्हानाचा पाठलाग करताना स्मृतीने ८० धावांची खेळी करत भारताला दमदार सुरुवात मिळवून दिली. तिच्या फलंदाजीच्या बळावर भारताने सात वेळा विश्वचषक जिंकलेल्या ऑस्ट्रेलियाला पराभूत केले आणि इतिहास रचला.
