( मुंबई )
भारताची आर्थिक राजधानी म्हणून ओळखली जाणारी मुंबई आता आशियातील सर्वात आनंदी शहर म्हणूनही ओळखली जात आहे. ‘टाइम आऊट’ (Time Out) या सुप्रसिद्ध आंतरराष्ट्रीय संस्थेने केलेल्या सर्वेक्षणात मुंबईने बीजिंग आणि शांघायसारख्या आधुनिक शहरांनाही मागे टाकत अव्वल स्थान पटकावले आहे.
‘मुंबई’कर सर्वात आनंदी
सर्वेक्षणानुसार, तब्बल ९४ टक्के मुंबईकरांनी आपल्या शहरात राहताना “आनंद मिळतो” असे सांगितले आहे, तर ८९ टक्के लोकांनी इतर कोणत्याही शहरापेक्षा मुंबईत राहणे अधिक समाधानदायी असल्याचे नमूद केले. मुंबईतील उत्साही सामाजिक वातावरण, करिअर संधी, विविध संस्कृतींचा मिलाफ आणि चविष्ट स्ट्रीट फूड यामुळे हे शहर आनंदी जीवनाचे प्रतीक बनले आहे.
चीनची शहरे दुसऱ्या व तिसऱ्या क्रमांकावर
या यादीत बीजिंग आणि शांघाय अनुक्रमे दुसऱ्या आणि तिसऱ्या स्थानी आहेत. बीजिंगमधील ९३ टक्के आणि शांघायमधील ९२ टक्के नागरिकांनी आपल्या शहराबद्दल समाधान व्यक्त केले आहे. आधुनिकता, सुरक्षितता आणि सांस्कृतिक समृद्धी या शहरांच्या आनंदाचे मुख्य घटक ठरले आहेत.
‘टोकियो’ पहिल्या १० मध्येही स्थान नाही
सोल, सिंगापूर आणि जपानची राजधानी टोकियो यांसारखी प्रसिद्ध महानगरे मात्र या यादीत मागे पडली आहेत. टोकियोला पहिल्या दहातही स्थान मिळाले नाही. वेगवान जीवनशैली, काम आणि वैयक्तिक जीवनातील असंतुलन, तसेच राहणीमानाचा वाढता खर्च या कारणांमुळे या शहरांचा आनंद निर्देशांक कमी झाल्याचे तज्ज्ञांचे म्हणणे आहे.
📊 आशियातील १० सर्वात आनंदी शहरे (Time Out सर्वेक्षणानुसार)
मुंबई, भारत
बीजिंग, चीन
शांघाय, चीन
चियांग माई, थायलंड
हनोई, व्हिएतनाम
जकार्ता, इंडोनेशिया
हाँगकाँग
बँकॉक, थायलंड
सिंगापूर
सोल, दक्षिण कोरिया
