(गणपतीपुळे / वैभव पवार)
मागील ऑक्टोबर महिन्याच्या दिवाळी पर्यटन हंगामात गणपतीपुळे समुद्रात लागोपाठ समुद्रात बुडणाऱ्यांची संख्या ताजी असतानाच नोव्हेंबरच्या पहिल्याच आठवड्यात सांगली जिल्ह्यातील विटा तालुका खानापूर येथील २५ वर्षीय तरुणाला समुद्रात बुडताना वाचविण्यात यश आल्याची माहिती समुद्रकिनाऱ्यावरील मोरया वॉटर स्पोर्ट व्यवसायिक आणि जीवरक्षकांकडून देण्यात आली आहे. शशांक धीरेंद्र कुलकर्णी (वय वर्षे 25) असे या तरुणाचे नाव आहे. ही घटना दुपारी एक वाजण्याच्या सुमारास घडली.
याबाबत अधिक माहिती अशी की, सांगली जिल्ह्यातील विटा तालुक्यातील खानापूर येथील सहा तरुण मित्र देवदर्शन आणि पर्यटनासाठी आले होते. त्यातील सर्वजण समुद्रात आंघोळीसाठी उतरले होते. यातील शशांक कुलकर्णी हा समुद्राच्या खोल पाण्यात गेल्यानंतर अडकला. यावेळी त्याच्या मित्रांनी आरडाओरडा केला असता समुद्रकिनाऱ्यावर असलेल्या मोरया वॉटर स्पोर्ट व्यावसायिकांचे कर्मचारी यांनी आपल्या जेस्की बोट ने तात्काळ क्षणाचाही विलंब न लावता संबंधित तरुण बुडत असलेल्या दिशेने धाव घेतली. त्यानंतर खोल पाण्यात बुडत असलेल्या शशांकला त्यांनी सुखरूपरित्या पाण्याबाहेर आणून त्याला वाचविण्यात यश मिळवले.
ही कामगिरी मोरया वॉटर स्पोर्टचे कर्मचारी कैलास किशोर शितप आणि आरिफुल यांनी केली. त्यांना गणपतीपुळे ग्रामपंचायतचे जीवरक्षक यांची मोलाची मदत मिळाली. या घटनेची माहिती मिळताच जयगड पोलीस ठाणेच्या अखत्यारीत असलेल्या मालगुंड गणपतीपुळे पोलीस दूरक्षेत्राचे पोलीस कर्मचारी यांनी घटनास्थळी भेट देऊन बुडणाऱ्या तरुणाची माहिती घेतली. दरम्यान, समुद्र किनाऱ्यावर असलेल्या पर्यटकांना समुद्राच्या धोकादायक स्थितीची माहिती कोणीही खोल पाण्यात जाऊ नये असे आवाहन पोलिसांनी केले आहे.
मागील दिवाळी पर्यटन हंगामात समुद्रात बुडणाऱ्यांच्या संख्येत वाढ झालेली असताना जयगड पोलीस ठाण्याच्या वतीने अत्यंत चोख पोलीस बंदोबस्त ठेवण्यात आला आहे. तसेच गणपतीपुळे ग्रामपंचायतचे जीवरक्षक, देवस्थान सुरक्षारक्षक आणि स्थानिक व्यावसायिक व ग्रामस्थ यांच्याकडून वारंवार पर्यटकांना सूचना दिल्या जात आहेत. परंतु पर्यटकांकडून अद्यापदेखील अतिउत्साहीपणा आणि बेजबाबदारपणा दाखवला जात असल्याने बुडण्याच्या घटनेला जबाबदार कोण? असा प्रश्न सध्या उपस्थित होऊ लागला आहे.
एकंदरीत पर्यटकांनी समुद्राच्या धोक्याची स्थिती लक्षात घेऊन जीवरक्षक आणि पोलिस यंत्रणेला सहकार्य करावे असे आवाहन करण्यात आले आहे.
फोटो : गणपतीपुळे समुद्रात बुडणाऱ्या पर्यटक तरुणाला कर्मचारी कैलास शितप व आरिफुल.
