(देवरूख / प्रतिनिधी)
वाहन चालकांना प्रशिक्षण देताना परिवहन नियमांचे काटेकोर पालन करून त्यांना सुरक्षिततेचा मार्ग दाखवणे आणि जबाबदार चालक तयार करणे ही मोठी जबाबदारी असल्याचे प्रतिपादन उप प्रादेशिक परिवहन अधिकारी करपे यांनी केले.
ते देवरूख येथील शारदा सॉ मिलजवळ सुरू झालेल्या ‘सोळजाई मोटार ट्रेनिंग स्कूल’च्या देवरूख शाखेच्या उद्घाटनप्रसंगी बोलत होते. या प्रसंगी परिवहन अधिकारी ताम्हणकर व कुंभार, ज्येष्ठ पत्रकार आणि मराठी पत्रकार परिषद रत्नागिरी जिल्हा उपाध्यक्ष सुरेश सप्रे, तसेच स्कूलचे संचालक योगेश धामणस्कर व आशू धामणस्कर उपस्थित होते.
युवा पिढीसाठी सुरक्षित वाहन प्रशिक्षणाचा उपक्रम
देवरूख हे तालुक्याचे ठिकाण असून शहराचा झपाट्याने विस्तार होत आहे. या पार्श्वभूमीवर स्थानिक युवकांना आणि नागरिकांना दर्जेदार वाहन प्रशिक्षण मिळावे या उद्देशाने योगेश धामणस्कर यांनी ‘सोळजाई मोटार ट्रेनिंग स्कूल’ची देवरूख शाखा सुरू केली आहे.
या उपक्रमामुळे परिसरातील युवकांना वाहन चालविण्याचे व्यवस्थित व शिस्तबद्ध प्रशिक्षण मिळण्याचा लाभ होणार आहे.
योग्य प्रशिक्षणातून सक्षम चालक घडवा – ताम्हणकर यांचे आवाहन
उद्घाटन प्रसंगी बोलताना परिवहन अधिकारी ताम्हणकर म्हणाले,
“युवा पिढीने या प्रशिक्षणाचा लाभ घेत कायद्याचे पालन करणारे, सुरक्षिततेची जाणीव असलेले आदर्श चालक बनावे. योग्य प्रशिक्षणातूनच सक्षम चालक घडतात, आणि तेच रस्ते अपघात कमी करण्यास मदत करतात.”
रिक्षा-टेम्पो चालक संघटनेचा सत्कार
या कार्यक्रमात परिवहन विभागाचे अधिकारी वर्ग, तसेच रिक्षा व टेम्पो चालक-मालक संघटनांच्या पदाधिकाऱ्यांनी उपस्थित अधिकारी आणि मान्यवरांचा सत्कार करून कार्यक्रमाला उत्साही वातावरण दिले.
