पुढील ४८ तास सावधान! ‘शक्ती’ चक्रीवादळामुळे मुंबईसह संपूर्ण कोकण किनारपट्टीवर हाय अलर्ट

(मुंबई)

अरबी समुद्रात निर्माण झालेलं ‘शक्ती’ चक्रीवादळ (Cyclone Shakthi) आता महाराष्ट्राच्या दिशेने वेगाने सरकत असून, या वादळाचा सर्वाधिक परिणाम मुंबई, ठाणे, पालघर, रायगड, रत्नागिरी आणि सिंधुदुर्ग या किनारपट्टीवरील जिल्ह्यांवर होण्याची शक्यता व्यक्त करण्यात आली आहे. पुढील ४८ तास राज्यासाठी अत्यंत निर्णायक ठरणार असून, राज्य प्रशासन आणि नागरिक या दोघांनाही हाय अलर्टवर राहण्याचे आवाहन करण्यात आले आहे.

भारतीय हवामान विभागाने (IMD) जारी केलेल्या ताज्या अंदाजानुसार, ३ ते ७ ऑक्टोबर दरम्यान या चक्रीवादळाचा प्रादुर्भाव दिसून येऊ शकतो. यावेळी अतिजोरदार वारे, मुसळधार पाऊस, आणि समुद्र खवळण्याची शक्यता वर्तवण्यात आली आहे. चक्रीवादळाचा मार्ग अरबी समुद्रातून उत्तरे-ईशान्य दिशेने सरकत असल्याने, महाराष्ट्राच्या संपूर्ण पश्चिम किनारपट्टीवर त्याचा थेट परिणाम होणार आहे.

🌊 कोकण किनारपट्टीला धोका

उत्तर कोकणातील किनारपट्टी भागात ताशी ४५ ते ५५ किमी वेगाने वारे वाहण्याची शक्यता असून, हा वेग ६५ किमी प्रतितास किंवा त्याहून अधिक होऊ शकतो. वादळ आणखी तीव्र झाल्यास वाऱ्यांचा वेग वाढून ७५ ते ८५ किमी प्रतितास इतका होण्याची शक्यता हवामान विभागाने व्यक्त केली आहे. समुद्रात तीव्र लाटा (storm surge) निर्माण होऊन समुद्राचं पाणी सखल भागात घुसण्याचा धोका असल्याने, मच्छिमारांना समुद्रात न जाण्याचे आणि किनाऱ्याजवळील नागरिकांना सुरक्षित ठिकाणी स्थलांतर करण्याचे निर्देश देण्यात आले आहेत.

☔ अंतर्गत भागांनाही पावसाचा तडाखा

या चक्रीवादळाचा प्रभाव केवळ किनारपट्टीपुरता मर्यादित न राहता, राज्याच्या मध्य आणि पूर्व भागातही जाणवण्याची शक्यता आहे. पूर्व विदर्भ आणि मराठवाडा या भागांत जोरदार ते अतिजोरदार पावसाचा इशारा देण्यात आला आहे. तर उत्तर कोकणात अतिवृष्टीची शक्यता वर्तवली गेल्याने, मुंबई, ठाणे आणि रायगड परिसरात पूरस्थिती आणि जलमय होण्याचा धोका आहे.

⚠️ प्रशासन सज्ज, नागरिकांना सतर्कतेचा इशारा

‘शक्ती’ चक्रीवादळाचा संभाव्य धोका लक्षात घेऊन महाराष्ट्र सरकारने सर्व जिल्हा प्रशासनांना आपत्ती व्यवस्थापन यंत्रणा (Disaster Management System) पूर्णपणे सक्रिय ठेवण्याचे आदेश दिले आहेत. आपत्कालीन पथके, एनडीआरएफ (NDRF) आणि स्थानिक बचाव पथके कोकण किनारपट्टीवर हाय अलर्टवर तैनात करण्यात आली आहेत.

नागरिकांना सूचना :

• समुद्रकिनारे, नद्या आणि धबधबे परिसर टाळा.
• अनावश्यक प्रवास करू नका आणि धोका वाटल्यास सुरक्षित ठिकाणी थांबा.
• प्रशासन, हवामान विभाग आणि स्थानिक यंत्रणांकडून जारी होणाऱ्या अधिकृत सूचना आणि इशाऱ्यांचे काटेकोर पालन करा.
• विद्युत खांब, झाडे यापासून लांब राहा, पाण्याच्या ठिकाणी वास्तव्य करणे टाळा.

संभाव्य परिस्थितीला राज्य सरकार सज्ज असून, निसर्गाच्या या रौद्र ‘शक्ती’चा सामना करण्यासाठी सर्व यंत्रणा युद्धपातळीवर कार्यरत आहेत. पुढील दोन दिवस नागरिकांसाठी आणि प्रशासनासाठी अत्यंत संवेदनशील असल्याने विशेष खबरदारी घेण्यात येत आहे.