(सिंधुदुर्ग)
सिंधुदुर्ग जिल्हा सहकारी संस्थांचे जिल्हा उपनिबंधक कार्यालयातील दोन वरिष्ठ अधिकारी लाच स्वीकारताना रंगेहाथ सापडले. लाचलुचपत विभागाचे पोलीस उपअधीक्षक अरुण पवार यांनी लावलेल्या सापळ्यात जिल्हा उपनिबंधक वर्ग १ माणिक भानुदास सांगळे व कार्यालय अधीक्षक वर्ग ३ – उर्मिला महादेव यादव यांना ३३ हजार रुपयांची लाच स्वीकारताना रंगेहाथ पकडण्यात आले.
गृहनिर्माण संस्थेच्या नोंदणीसाठी तक्रारदार यांचे श्री स्वामी समर्थ गृहनिर्माण संस्था मर्यादित, रेवतळे या गृहनिर्माण संस्थेच्या मानीव अभिहस्तांतरण आदेशाप्रमाणे अंमलबजावणी करून जमीन संस्थेच्या नावे करण्यासाठी ४० हजार रुपये रकमेच्या लाचेची मागणी संबंधित अधिकाऱ्यांनी केली होती. त्याबाबत तक्रारदार यांनी लाचलुचपत विभागाकडे १० जानेवारी २०२५ रोजी तक्रार केली होती. १६ जानेवारी २०२५ रोजी पंचांसमक्ष करण्यात आलेल्या पडताळणीदरम्यान संशयित आरोपी उर्मिला यादव यांनी तक्रारदार यांच्याकडे रुपये ४० हजार रुपये लाचेची रक्कम मागणी केली होती. त्याबाबत लाच स्वीकारण्याचे तिने मान्य केले होते. त्यानुसार, लाचलुचपत विभागाने ही धडक कारवाई करत भ्रष्टाचाराला लगाम घालण्याचा प्रयत्न केला आहे.
त्यानुसार दि. ४ फेब्रुवारी रोजी करण्यात आलेल्या दुसऱ्या पडताळणी कारवाई दरम्यान दोन्ही आरोपी लोकसेवक माणिक सांगळे यांनी तक्रारदार यांचेकडे रुपये ३३ हजार लाच मागणी केली तसेच आरोपी लोकसेविका उर्मिला यादव या तक्रारदार यांच्याकडे लाचमागणी करीत असताना आरोपी लोकसेवक माणिक सांगळे यांनी तेथे हजर राहून लाच मागणीस प्रोत्साहन दिले.
दि. ४ फेब्रुवारी रोजी आरोपी लोकसेविका २ यांनी तक्रारदार यांचेकडून मागणी केलेली लाचेची रक्कम रुपये ३३ हजार पंच साक्षीदार यांचे समक्ष तक्रारदार यांचेकडून स्वीकारताना रंगेहाथ पकडून ताब्यात घेण्यात आले आहे.
दोन्ही आरोपी लोकसेवक यांचेविरुध्द गुन्हा दाखल करण्याची प्रक्रिया सुरू आहे. सिंधुदुर्ग लाचलुचपत प्रतिबंधक विभागाचे यांच्या नेतृत्वाखाली ही कारवाई करण्यात आली.
