(रत्नागिरी)
खेड तालुक्यातील धामणदेवी येथे घडलेल्या धाडसी चोरीच्या घटनेचा केवळ २४ तासांत पर्दाफाश करत खेड पोलिसांनी दोन आरोपींना मुद्देमालासह जेरबंद करण्यात मोठे यश मिळवले आहे. पोलिसांच्या या वेगवान कारवाईचे व्यापारी समाजाकडून विशेष कौतुक होत आहे.
मिरजोळीतील भंगार व्यावसायिक सादिक सलीम कुरेशी (वय २९) यांच्या गोडावूनमधून तब्बल ६४ हजार रुपये किमतीचे एम. एस. पत्राचे ६४ ड्रम सिट अज्ञात चोरट्यांनी लंपास केले होते. ही घटना २९ सप्टेंबरच्या सायंकाळी ६ वाजल्यापासून ते ३० सप्टेंबरच्या सकाळी ९.३० या कालावधीत घडली. चोरी उघडकीस आल्यानंतर कुरेशी यांनी तत्काळ खेड पोलीस ठाण्यात धाव घेत तक्रार दाखल केली.
घटनेचे गांभीर्य लक्षात घेऊन पोलिसांनी जलदगतीने तपास सुरू केला. मिळालेल्या गोपनीय माहितीच्या आधारे पोलिसांनी दोन संशयितांना ताब्यात घेतले. चौकशीत आरोपी मंदार श्याम हुमणे (रा. परशुराम, दुर्गेवाडी, ता. चिपळूण) व संकेत महाडिक (रा. पाली, ता. खेड) यांनी संगनमताने ही चोरी केल्याचे स्पष्ट झाले. हे दोघे आरोपी चोरीचा माल (एम. एच. ०८ बी.सी. ०३२२) या क्रमांकाच्या रिक्षा टेम्पोतून नेत असताना पोलिसांच्या तावडीत सापडले. पोलिसांनी गुन्ह्यातील संपूर्ण ऐवज जप्त करत आरोपींना अटक केली. चोरीला गेलेला ऐवज तसेच गुन्ह्यात वापरलेला टेम्पो मिळून आले असून, पुढील कायदेशीर कार्यवाही सुरू आहे. या जलदगती कारवाईमुळे भंगार व्यवसायिकांनी खेड पोलिसांचे कौतुक करत समाधान व्यक्त केले आहे.
