(राजापूर)
तालुक्यातील नूतन विद्यामंदिर, ओणीचे माजी प्राचार्य गुरुवर्य शहाजीराव भाऊराव खानविलकर (वय ८५) यांचे मंगळवारी सायंकाळी अल्पशा आजाराने निधन झाले. त्यांच्या जाण्याने शैक्षणिक व सामाजिक क्षेत्रात हळहळ व्यक्त होत आहे.
लांजा तालुक्यातील गोळवशी गावचे मूळ रहिवासी असलेले खानविलकर हे ओणी येथे स्थायिक झाले होते. ओणी पंचक्रोशी शिक्षण मंडळाच्या नूतन विद्यामंदिर व कनिष्ठ महाविद्यालयातून त्यांनी सेवापूर्ती केली. या शाळेच्या उभारणीत व जडणघडणीत त्यांचा सिंहाचा वाटा होता. शिस्तप्रिय, आत्मीयतेने विद्यार्थ्यांना मार्गदर्शन करणारे, विद्यार्थीप्रिय शिक्षक म्हणून त्यांची ओळख होती. त्यांच्या कार्यकाळात शेकडो विद्यार्थ्यांनी दर्जेदार शिक्षणाच्या बळावर उच्च पदे गाठली.
शैक्षणिक योगदानाबद्दल त्यांना विविध सन्मान प्राप्त झाले होते. ‘गुरुवर्य पुरस्कार’ हा मानाचा पुरस्कारही त्यांना मिळाला होता. राजापूर तालुका मराठा समाज सेवा संघात त्यांनी खजिनदार म्हणून कार्य करत समाजकार्याला हातभार लावला.
गेल्या काही दिवसांपासून त्यांची प्रकृती बिघडली होती. खाजगी रुग्णालयात उपचारानंतर मंगळवारी दुपारी त्यांना घरी आणण्यात आले, मात्र सायंकाळी त्यांची प्राणज्योत मालवली.
खानविलकर यांच्या पार्थिवावर आज (बुधवार) सकाळी १० वाजता ओणी येथे अंत्यसंस्कार करण्यात येणार आहेत. त्यांच्या पश्चात पत्नी, मुलगा, सून, नातवंडे, भाऊ, पुतणे असा मोठा परिवार आहे.
त्यांच्या निधनाने एक समर्पित शिक्षक, समाजसेवक व मार्गदर्शक व्यक्तिमत्त्व हरपल्याची भावना सर्वत्र व्यक्त होत आहे.
