(राजापूर)
सार्वजनिक आरोग्य आणि जनहिताच्या दृष्टीने महाराष्ट्र शासनाने बंदी घातलेला तब्बल १ लाख ८८ हजार २१६ रुपयांचा पानमसाला व सुगंधी तंबाखू नाटे पोलिसांनी जप्त केला आहे. ही कारवाई १९ ऑगस्ट रोजी सायंकाळी साडेसहा वाजता मिठगवाणे–पारवाडी रस्त्यावर करण्यात आली. या प्रकरणी रवींद्र महादेव शिंदे (२७, रा. कोतापूर मेडवई, ता. राजापूर) याला अटक करण्यात आली आहे.
सागरी पोलिस ठाणे नाटे येथे कार्यरत पोलीस कॉन्स्टेबल दत्तात्रय शिवाजी पाटील यांनी या संदर्भात फिर्याद दिली आहे. मिळालेल्या माहितीनुसार, पोलिसांनी पारवाडी रस्त्यावर सापळा रचून (एमएच-०८ एएन ०७६१) क्रमांकाच्या पांढऱ्या मारुती ओमनी गाडीची झडती घेतली. यावेळी आरोपी शिंदे हा गाडीत बेकायदेशीररीत्या प्रतिबंधित पानमसाला व तंबाखू साठवून असल्याचे आढळून आले.
या कारवाईत पोलिसांनी १ लाख ७० हजार रुपयांची ओमनी गाडी आणि १८ हजार २१६ रुपयांचा सुगंधी तंबाखू व केसरयुक्त विमल पानमसाला असा एकूण १.८८ लाख रुपयांचा मुद्देमाल जप्त केला. या साठ्यात जांभळ्या पाकिटांमध्ये प्रत्येकी ११ पुड्या असलेले ९२ नग पानमसाला व ९२ नग तंबाखूचा समावेश असल्याचे पोलिसांनी सांगितले. या प्रकरणी आरोपीवर गुन्हा दाखल करण्यात आला असून पुढील तपास नाटे पोलिस करत आहेत.
